ଗୋୱାଲିୟର,୨୧/୯ (ସନ୍ଧାନ ନିୟୁଜ):: ମଧ୍ୟପ୍ରଦେଶର ଗୋୱାଲିୟରଠାରେ ଗଣେଶ ବିସର୍ଜନ କରିବାକୁ ଯାଇ ୪ଜଣ ସ୍କୁଲ ଛାତ୍ରଙ୍କ ମୃତ୍ୟୁ ହୋଇଯାଇଛି। ଗୁରୁବାର ଅପରାହ୍ଣ ୪ଟାବେଳେ ଗଣେଶ ବିସର୍ଜନ କରିବା ନିମନ୍ତେ ଗ୍ରାମର ସମସ୍ତ ଛାତ୍ର ଧୂମଧାମରେ ବାହାରି ଥିଲେ। ଏମିଟି ବିଶ୍ୱବିଦ୍ୟାଳୟ ପଛରେ ଥିବା ପାହାଡ଼ିଆ ଅଞ୍ଚଳର ଏକ ଜଳମଗ୍ନ ସ୍ଥାନରେ ଗଣେଶଙ୍କ ବିସର୍ଜନ କରିବା ଉଦ୍ଦେଶ୍ୟରେ ଗ୍ରାମର ଛାତ୍ରମାନେ ବାହାରି ଥିଲେ। ପାହାଡ଼ ମଧ୍ୟରେ ଥିବା ୧୦ଫୁଟ୍ ଗଭୀର ଏହି ଜଳମଗ୍ନ ସ୍ଥାନରେ ପ୍ରତିମା ବିସର୍ଜନ ନିମନ୍ତେ ୭ଜଣ ଛାତ୍ର ପାଣିରେ ଓହ୍ଲାଇ ଥିଲେ।
ପ୍ରତିମା ନେଇ ଯେତେବେଳେ ଛାତ୍ରମାନେ ପାଣି ମଧ୍ୟରେ ପ୍ରବେଶ କଲେ କିଛି ବାଟ ଗଲାପରେ ଜଣେ ପିଲାଙ୍କୁ ଆଗକୁ ଯିବାକୁ ବାରଣ କରିଥିଲେ। ଫଳରେ ଛାତ୍ରମାନେ ପ୍ରତିମାକୁ ସେଠାରେ ବିସର୍ଜନ କରି ଫେରୁଥିବାବେଳେ ହଠାତ୍ ଜଳମଗ୍ନ ସ୍ଥାନରେ ଥିବା ୧୦ଫୁଟ୍ ଗଭୀର ଗର୍ତ୍ତ ସନ୍ନିକଟ ମାଟି ଧସି ଯାଇଥିଲା। ଫଳରେ ପ୍ରତିମାର ସମ୍ମୁଖ ଭାଗରେ ଥିବା ୨ଜଣ ପିଲା ପାଣିରେ ବୁଡ଼ି ଯାଇଥିଲେ। ପ୍ରତିମା ଆଗରେ ଥିବା ସାନ ଭାଇ ବୁଡ଼ି ଯାଉଥିବା ଦେଖି ପଛରେ ଥିବା ବଡ଼ଭାଇ ତାକୁ ଉଦ୍ଧାର କରିବାକୁ ଯାଇ ସେ ମଧ୍ୟ ବୁଡ଼ି ଯାଇଥିଲେ। ଦେଖୁଦେଖୁ ଆଖି ପିଛୁଳାକେ ୪ଜଣ ଛାତ୍ର ପାଣିରେ ବୁଡ଼ି ଯାଇଥିଲେ।
