ବଡଚଣା: ମରଣଯନ୍ତା ପାଲଟିଛି ବାଙ୍ଗରଗୁଣ୍ଠା-ବଡଘୁମୁରୀ ରାସ୍ତା

ବଡଚଣା,୫.୯(ସନ୍ଧାନ ନିୟୁଜ)ବଡଚଣା ବ୍ଲକ ଅନ୍ତର୍ଗତ ବଡଘୁମୁରୀ ପଞ୍ଚାୟତର ଉଦୟନଗର ପାଟର ୧ନମ୍ବର ୱାର୍ଡର ମୁଖ୍ୟ ରାସ୍ତା ଏବେ ମରଣଯନ୍ତା ପାଲଟିଛି । ରାଧାଦେଇପୁର ପଞ୍ଚାୟତର ବାଙ୍ଗରଗୁଣ୍ଠା ଠାରୁ ବଡଘୁମୁରୀ ପଞ୍ଚାୟତକୁ ସଂଯୋଗ କରୁଥିବା ଏହି ମୁଖ୍ୟ ରାସ୍ତା ଉପରେ ବାଙ୍ଗରଗୁଣ୍ଠା,ଉଦୟନଗର,ପାଇକରାପୁର,ବଡଘୁମୁରୀ,ଭୁବନପୁର ଆଦି ଗ୍ରାମର ଜନସାଧାରଣ ନିର୍ଭର କରିଥାନ୍ତି । ଏହି ଅଂଚଳଟି ବନ୍ୟାପ୍ଲାବିତ ଅଂଚଳ ହୋଇଥିବାରୁ ସରକାରଙ୍କ ପକ୍ଷରୁ ଅନେକ ଥର ଉକ୍ତ ରାସ୍ତା ନିର୍ମାଣ ପାଇଁ ଯୋଜନା କରାଯାଉଥିଲେ ମଧ୍ୟ ରାସ୍ତା ଅବସ୍ଥା ଯେପରି ଥିଲା ସେପରି ଅଛି । ସାନଗେଙ୍ଗୁଟି ନଦୀବନ୍ଧର ଏକପାଶ୍ୱର୍ରେ ଉକ୍ତ ରାସ୍ତାଟି ଯାଉଥିବାରୁ ଉନ୍ନତ ରାସ୍ତା ନଥିବାରୁ ଲୋକମାନେ ନାହିନଥିବା ହଇରାଣ ହରକତ ହେଉଥିବା ବେଳେ ବିଭାଗୀୟ ଅଧିକାରୀଙ୍କ ଦୃଷ୍ଟି ନପଡିବା ସାଧାରଣରେ ଆଲୋଚନା ଜୋର ଧରିଛି । ଏନେଇ ଉଦୟନଗର ଗ୍ରାମର କିଛି ଯୁବକ ରାସ୍ତାର ଦୁରାବସ୍ଥା ନେଇ ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନଥିବା ଅଭିଯୋଗ କରିଛନ୍ତି । ଏଥିପ୍ରତି ଯାଜପୁର ଜିଲାପାଳ ଦୃଷ୍ଟି ଦେବାକୁ ସାଧାରଣରେ ଦାବୀ ହେଉଛି ।