ଜେନାପୁର/୨୧/୬ (ସନ୍ଧାନ ନ୍ୟୁଜ): ସୁସ୍ଥ ଶରୀର ଓ ଶାନ୍ତ ମନ ହିଁ ସମୃଦ୍ଧ ସମାଜର ପ୍ରକୃତ ପୁଞ୍ଜି। ଏହି ବାର୍ତ୍ତାକୁ ପାଥେୟ କରି ଯାଜପୁର ଜିଲ୍ଲା ଧର୍ମଶାଳା ବ୍ଲକ ଏଣ୍ଡଳବା ପଞ୍ଚାୟତ ଅନ୍ତର୍ଗତ କଲାଣ୍ଡ ଆୟୁର୍ବେଦ ଚିକିତ୍ସାଳୟ ପରିସରରେ ଆନ୍ତର୍ଜାତୀୟ ଯୋଗ ଦିବସ ଅତ୍ୟନ୍ତ ଉତ୍ସାହର ସହ ପାଳିତ ହୋଇଯାଇଛି। ଆୟୁର୍ବେଦ ଏବଂ ଯୋଗର ଅପୂର୍ବ ସମନ୍ୱୟରେ ଆୟୋଜିତ ଏହି କାର୍ଯ୍ୟକ୍ରମ ସ୍ଥାନୀୟ ଅଞ୍ଚଳରେ ଏକ ନୂଆ ସକାରାତ୍ମକ ଜାଗରଣ ସୃଷ୍ଟି କରିଛି।
ଚିକିତ୍ସାଳୟର ବରିଷ୍ଠ ଆୟୁର୍ବେଦ ଚିକିତ୍ସିକା ଡାକ୍ତର ପ୍ରୀତିପୂତା ହୋତାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏକ ସାମୂହିକ ଯୋଗ ଶିବିର ଅନୁଷ୍ଠିତ ହୋଇଥିଲା। ଏହି ଅବସରରେ ଡାକ୍ତର ହୋତା କହିଥିଲେ ଯେ, ଆଧୁନିକ ଜୀବନଶୈଳୀର ମାନସିକ ଚାପ ଓ ରୋଗରୁ ମୁକ୍ତି ପାଇଁ ଯୋଗ ଏବଂ ଆୟୁର୍ବେଦ ହିଁ ସର୍ବଶ୍ରେଷ୍ଠ ନିରାପଦ ମାଧ୍ୟମ। ଦୈନନ୍ଦିନ ଜୀବନରେ ଯୋଗକୁ ଆପଣାଇ ଆମେ ଏକ ନିରୋଗ ଜୀବନ ଜୀଇଁପାରିବା।
ଏହି କାର୍ଯ୍ୟକ୍ରମକୁ ଚିକିତ୍ସାଳୟର କର୍ମଚାରୀ ଲକ୍ଷ୍ମୀଧର ପଣ୍ଡା ଓ ସାଗରୀକା ଦଳାଇ ପ୍ରମୁଖ ସୁଚାରୁରୂପେ ପରିଚାଳନା କରିଥିଲେ। କଲାଣ୍ଡ ଓ ଆଖପାଖ ଅଞ୍ଚଳର ବହୁ ସଂଖ୍ୟକ ମହିଳା ଓ ପୁରୁଷ ସ୍ୱତଃସ୍ଫୂର୍ତ୍ତ ଭାବେ ଏଥିରେ ସାମିଲ ହୋଇ ପ୍ରାଣାୟାମ ଓ ଆସନ ଅଭ୍ୟାସ କରିବା ସହ ଜୀବନରେ ସଦାସର୍ବଦା ଯୋଗ କରିବାକୁ ସଙ୍କଳ୍ପ ନେଇଥିଲେ। ଗ୍ରାମାଞ୍ଚଳରେ ସ୍ୱାସ୍ଥ୍ୟ ସଚେତନତା ସୃଷ୍ଟି କରିବାରେ କଲାଣ୍ଡ ଆୟୁର୍ବେଦ ଚିକିତ୍ସାଳୟର ଏଭଳି ପ୍ରୟାସକୁ ଏଣ୍ଡଳବା ପଞ୍ଚାୟତବାସୀ ଓ ବୁଦ୍ଧିଜୀବୀ ମହଲରେ ଉଚ୍ଚ ପ୍ରଶଂସା କରାଯାଇଛି।
