ସୀମାରେ ଯବାନ, ଯାଜପୁରରୁ ଭଲପାଇବାର ରାଖୀ ଏସ୍‌ଏନ୍‌ଏମ୍‌ ସହଯୋଗରେ କନ୍ୟାଶ୍ରମ ଶିଶୁ ପ୍ରସ୍ତୁତ କଲେ ୧୦୦୦ ରାଖୀ — ଚୀନ ଓ ପାକିସ୍ତାନ ସୀମାରେ ପହଞ୍ଚିବ ଓଡ଼ିଆ ମାଟିର ସ୍ନେହ

ଜେନାପୁର /୨୩/୮(ସନ୍ଧାନ ନ୍ୟୁଜ )ସୀମାରେ ଜଗିଛନ୍ତି ବୀର ଯବାନ। ଘରଠାରୁ ହଜାର ହଜାର କିଲୋମିଟର ଦୂରରେ ରହି ଦେଶର ସୁରକ୍ଷା ପାଇଁ ନିଜ ଜୀବନକୁ ସମର୍ପିତ କରିଥିବା ସେହି ବୀର ସୈନିକଙ୍କ ହାତରେ ଏଥର ଶୋଭା ପାଇବ ଯାଜପୁରର ରାଖୀ। ଏହା କେବଳ ଏକ ରାଖୀ ନୁହେଁ, ବରଂ ଦୂର ସୀମାରେ ଥିବା ଯବାନଙ୍କ ପାଇଁ ଓଡ଼ିଶା ମାଟିର ସ୍ନେହ, ସମ୍ମାନ, ଶୁଭେଚ୍ଛା ଓ କୃତଜ୍ଞତାର ପ୍ରତୀକ।
ବୀର ଯବାନମାନଙ୍କ ପ୍ରତି ସମ୍ମାନ ଓ ଦେଶପ୍ରେମର ଏହି ଅନନ୍ୟ ଉଦାହରଣ ସୃଷ୍ଟି କରିଛି ଟିମ୍‌ ଏସ୍‌ଏନ୍‌ଏମ୍‌। ଏସ୍‌ଏନ୍‌ଏମ୍‌ ସହଯୋଗରେ ଅର୍ଣ୍ଣପୂର୍ଣ୍ଣା ଶିଶୁ ଆଶ୍ରମରେ ଆୟୋଜିତ ‘ରାଖୀ ଫର୍ ସୋଲଜର୍ସ’ କାର୍ଯ୍ୟକ୍ରମରେ କନ୍ୟାଶ୍ରମର ଶିଶୁମାନେ ନିଜ ହାତରେ ପ୍ରସ୍ତୁତ କରିଛନ୍ତି ୧୦୦୦ଟି ରାଖୀ।
ରାଖୀ ପ୍ରସ୍ତୁତ କରୁଥିବା ସମୟରେ ଶିଶୁମାନଙ୍କ ମନରେ ଥିଲା ଦେଶର ବୀର ଯବାନଙ୍କ ପ୍ରତି ଅସୀମ ସମ୍ମାନ। ସେମାନଙ୍କ ହାତରେ ତିଆରି ପ୍ରତ୍ୟେକ ରାଖୀରେ ଯେପରି ଯୋଡ଼ି ହୋଇଛି ଏକ ଏକଟି ପ୍ରାର୍ଥନା—‘ଆମ ଯବାନ ଭାଇ ସୁରକ୍ଷିତ ରୁହନ୍ତୁ, ଦେଶକୁ ସୁରକ୍ଷା ଦେଇ ଗର୍ବର ସହ ଘରକୁ ଫେରନ୍ତୁ।’
ଚୀନ ଓ ପାକିସ୍ତାନ ସୀମାରେ ନିୟୋଜିତ ଭାରତୀୟ ଯବାନଙ୍କ ନିକଟକୁ ଏହି ରାଖୀ ପଠାଯିବ। ପରିବାରଠାରୁ ଦୂରରେ ରହି ରାଖୀ ପୂର୍ଣ୍ଣିମାର ଉତ୍ସବ ପାଳନ କରୁଥିବା ଯବାନଙ୍କ ହାତରେ ଯେତେବେଳେ ଯାଜପୁରର ଏହି ରାଖୀ ବନ୍ଧାହେବ, ସେତେବେଳେ ଏହା ସେମାନଙ୍କୁ ନିଜ ଘର, ଭଉଣୀ ଓ ପରିବାରର ସ୍ନେହର ଅନୁଭବ ଦେବ ବୋଲି ଆୟୋଜକମାନେ ଆଶା ପ୍ରକାଶ କରିଛନ୍ତି।
ଟିମ୍‌ ଏସ୍‌ଏନ୍‌ଏମ୍‌ ପକ୍ଷରୁ ଲଗାତାର ୫ ବର୍ଷ ଧରି ‘ରାଖୀ ଫର୍ ସୋଲଜର୍ସ’ କାର୍ଯ୍ୟକ୍ରମ ଆୟୋଜିତ ହୋଇଆସୁଛି। ଶିଶୁମାନଙ୍କ ମନରେ ଦେଶପ୍ରେମ ଓ ମାନବିକତାର ଭାବନା ଜାଗ୍ରତ କରିବା ସହିତ ଦେଶର ରକ୍ଷା ପାଇଁ ନିୟୋଜିତ ଯବାନଙ୍କ ତ୍ୟାଗକୁ ସମ୍ମାନ ଜଣାଇବା ଏହି ଅଭିଯାନର ମୁଖ୍ୟ ଲକ୍ଷ୍ୟ।
ଏସ୍‌ଏନ୍‌ଏମ୍‌ର ଆବାହକ ସରୋଜ ବେହେରା କହିଛନ୍ତି, “ରାଖୀର ସୂତା ଛୋଟ ହୋଇପାରେ, କିନ୍ତୁ ଏଥିରେ ଲୁଚିଥିବା ସ୍ନେହ ଓ ସମ୍ମାନ ଅସୀମ। ଦେଶର ସୁରକ୍ଷା ପାଇଁ ଯେଉଁ ବୀର ଯବାନମାନେ ନିଜ ପରିବାରଠାରୁ ଦୂରରେ ରହୁଛନ୍ତି, ଏହି ରାଖୀ ମାଧ୍ୟମରେ ସେମାନଙ୍କ ପାଖରେ ଆମ ଭଲପାଇବା ପହଞ୍ଚାଇବା ହିଁ ଆମର ଉଦ୍ଦେଶ୍ୟ।”
କାର୍ଯ୍ୟକ୍ରମରେ ଅର୍ଣ୍ଣପୂର୍ଣ୍ଣା ଶିଶୁ ଆଶ୍ରମର ମୁଖ୍ୟ ପବିତ୍ର ମୋହନ ସାହୁଙ୍କ ସମେତ ଏସ୍‌ଏନ୍‌ଏମ୍‌ ପରିବାରର କୁମାର ତପନ, ପ୍ରାଣକୃଷ୍ଣ ପୃଷ୍ଟି, ବିନାୟକ ସାହୁ, ଉପଦେଷ୍ଟା ପରମାନନ୍ଦ ସାହୁ, ପଙ୍କଜ ମଲ୍ଲ, ସୁବ୍ରତ ସାହୁ, ପ୍ରଶାନ୍ତ ସାମଲ, ଗଗନ ମହାନ୍ତି, ମଳୟ ବଳ, ଦେବାଶିଷ ବେହେରା ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ।