ଭଦ୍ରକ, ୧୫/୦୬ (ସନ୍ଧାନ ନିୟୁଜ)–ହ୍ୱାଟସ୍ଆପ୍ ଗ୍ରୁପରେ ଅଶ୍ଳିଳ ଭିଡ଼ିଓ ପୋଷ୍ଟ କରି ନିଲମ୍ବିତ ହୋଇଛନ୍ତି ଆରସିବିଏଲ ହାଇସ୍କୁଲର ଭାରପ୍ରାପ୍ତ ପ୍ରଧାନଶିକ୍ଷକ ମୁକ୍ତିକାନ୍ତ ମହାନ୍ତି । ଜିଲ୍ଲା ଶିକ୍ଷାଧିକାରୀ ସଂଗ୍ରାମ କୁମାର ସାହୁ ପତ୍ରାଙ୍କ ନଂ ୬୦୫୫ମୂଳେ ଶ୍ରୀ ମହାନ୍ତିଙ୍କୁ ନିଲମ୍ବନ କରିବା ସହ ଅନ୍ୟାଦେଶ ପର୍ଯ୍ୟନ୍ତ ଭଦ୍ରକ ପୁରୁଣାବଜାର ଏନସି ହାଇସ୍କୁଲରେ କାର୍ଯ୍ୟ କରିବାକୁ ନିର୍ଦ୍ଧେଶ ଦେଇଛନ୍ତି । 
ସୂଚନା ଥାଉକି ଭଦ୍ରକ ଜିଲ୍ଲାର ଜିଲ୍ଲା ଶିକ୍ଷାଧିକାରୀ ଓ ସମସ୍ତ ପ୍ରଧାନଶିକ୍ଷକଙ୍କୁ ନେଇ ‘ଡ଼ିଇଓ ଗ୍ରୁପ’ ନାମରେ ଏକ ହ୍ୱାଟସ୍ଆପ୍ ଗ୍ରୁପ୍ ଦୀର୍ଘଦିନ ଧରି କାର୍ଯ୍ୟ କରୁଥିଲା । ସରକାରଙ୍କ ବିଦ୍ୟାଳୟ ସମ୍ପର୍କୀତ ବିଭିନ୍ନ ନିର୍ଦ୍ଧେଶାବଳୀ ଓ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପାଇଁ ଏହି ଗ୍ରୁପକୁ ପ୍ରଧାନଶିକ୍ଷକ, ଜିଲ୍ଲା ଶିକ୍ଷାଧିକାରୀ ଓ ତାଙ୍କ କାର୍ଯ୍ୟାଳୟର ପଦସ୍ଥ ଅଧିକାରୀମାନେ ଏହାକୁ ବ୍ୟବହାର କରୁଥିଲେ । ତେବେ ୯ତାରିଖ ସକାଳେ ଏକ ଅଶ୍ଳିଳ ଭିଡ଼ିଓ ଏହି ଗ୍ରୁପରେ ପୋଷ୍ଟ ହୋଇଥିବାର ଦେଖିବାକୁ ମିଳିଥିଲା । ସହରର ଅନ୍ୟତମ ପ୍ରତିଷ୍ଠିତ ବିଦ୍ୟାଳୟ ଆରସିବିଏଲ ହାଇସ୍କୁଲର ଭାରପ୍ରାପ୍ତ ପ୍ରଧାନଶିକ୍ଷକ ଶ୍ରୀ ମହାନ୍ତି ଏହାକୁ ପୋଷ୍ଟ କରିଥିବା ଜଣାପଡ଼ିଥିଲା । ଏହି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଥିଲା । ଏହି ତଥ୍ୟ ଗଣମାଧ୍ୟମରେ ପ୍ରକାଶପାଇବା ପରେ ଜିଲ୍ଲାଶିକ୍ଷାଧିକାରୀ ଏପରି ନିର୍ଣ୍ଣୟ ନେଇଛନ୍ତି ।
