ବାରିପଦା ୧୪/୦୮/୨୦୨୦ (ସନ୍ଧାନ ନିଉଜ/ଲିଙ୍ଗରାଜ ପଣ୍ଡା):- ଖୁଣ୍ଟା ଥାନା ଅଧୀନ ଘାଗରାର ଏକ ଜଳବିଭାଜିକା ଜଏଣ୍ଟ ଆକାଉଣ୍ଟରୁ ତଞ୍ଚକତା କରାଯାଇ ୩,୮୭, ୪୪୨ଟଙ୍କା ଠକେଇ ହୋଇଥିବା ନେଇ ଗୋପବନ୍ଧୁନଗର ଜଳବିଭାଜିକା ବିଭାଗର ପ୍ରକଳ୍ପ କାର୍ଯ୍ୟାନ୍ବୟନ ଅଧୁକାରୀ (ପିଆଇଏ) ଖୁଣ୍ଟା ଥାନାରେ ଅଭିଯୋଗ କରିଛନ୍ତି । ଏନେଇ ପୁଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖୁଛି ।
ଅଭିଯୋଗ ଅନୁସାରେ ଘାଗରାର ସିନ୍ଦୁରଗୌରା ଜଳବିଭାଜିକା କମିଟିର ଷ୍ଟେଟବ୍ୟାଙ୍କ ଅଫ ଇଣ୍ଡିଆ ପଶ୍ନଦା ଶାଖାରେ ଏକ ଜଏଣ୍ଟ ଆକାଉଣ୍ଟ ରହିଛି । ଉକ୍ତ ଆକାଉଣ୍ଟ ଅଭିଯୋଗକାରିଣୀ ତଥା ଜଳବିଭାଜିକା ପିଆଇଏ ଆରତୀ ସେଠୀଙ୍କ ସମେତ କମିଟିର ସଭାପତି ଓ ସମ୍ପାଦକଙ୍କ ନାମରେ ରହିଛି। ଗତ ଫେବୃୟାରୀ ମାସରୁ ଜଳ ବିଭାଜିକା ଅଧୀନରେ କୌଣସି କାର୍ଯ୍ୟ କରାଯାଇନାହିଁ । ତେବେ ପିଆଇଏ ଆରତୀ ସେଠୀ ନିକଟରେ ଉକ୍ତ ପାଶ ବହିକୁ ଅପଡେଟ(ନବୀକରଣ) କରିବା ପରେ ଉକ୍ତ ଆକାଉଣ୍ଟରୁ ୧୫-୬-୨୦୨୦ ତାରିଖରେ ୩,୮୭,୪୪୨ ଟଙ୍କା ଅନଲାଇନ ଯୋଗେ ଉଠାଣ ହୋଇ ଜନୈକ ଭେଣ୍ଡରଙ୍କ ଆକାଉଣ୍ଟକୁ ଯାଇଥିବା ଜାଣିବାକୁ ପାଇଥିଲେ ଅଧୀକ – ଖୋଳତାଡ଼ ପରେ ସିନ୍ଦୁରଗୌରା ଜଳବିଭାଜିକା ଅଧୀନରେ ଏକ ମାଟିକାମ ପାଇଁ ଅନୁମତି ପତ୍ର ବା ପ୍ରପୋଜାଲ ଫର୍ମ ଜରିଆରେ ଉକ୍ତ ଟଙ୍କା ଉଠାଣ ହୋଇଥିବା ଜଣାପଡିଥିଲା । ପ୍ରପଜାଲ ଫର୍ମରେ ଆରତୀ ସେଠୀଙ୍କ ଦସ୍ତଖତକୁ ଜାଲ କରାଯାଇଥିବା ନିଜେ ଅଭିଯୋଗ କରିବା ପରେ ସୁଚିନ୍ତିତ ଉପାୟରେ ତଞ୍ଚକତା କରାଯାଇ ଉକ୍ତ ଟଙ୍କା ଉଠାଣ ହୋଇଥିବା ସୃଷ୍ଟି ହୋଇଛି । ଅପରପକ୍ଷେ କମିଟିର ସଭାପତି ଓ ସମ୍ପାଦକଙ୍କୁ ପଚାରିବାରୁ ଟଙ୍କା ଉଠାଣ ବାବଦରେ ସେମାନେ କିଛି ଜାଣନ୍ତି ନାହିଁ, ଏପରିକି କମିଟି ରିଜଲ୍ୟୁସନ ଖାତାରେ କୌଣସି । ମାଟିକାମ ବାବଦରେ ଉଲ୍ଲେଖ ନଥିବା ସେମାନେ କହିଛନ୍ତି । ଟଙ୍କା କାରବାରରେ ବ୍ୟାଙ୍କର ପଶୁଦା ଶାଖା କର୍ତ୍ତୁପକ୍ଷ କେଉଁ ପରିସ୍ଥିତିରେ ଜାଲ ପ୍ରପୋଜାଲ ଫର୍ମକୁ ଜାଣି ପାରିଲେ ନାହିଁ ଓ ଟଙ୍କା ଅନଲାଇନରେ ଅନ୍ୟକୁ ପଠାଇଲେ ସେନେଇ ଭିନ୍ନ କଥା ଆଲୋଚନା ହେଉଛି । ପୁଲିସ ତଦନ୍ତ ଆରମ୍ଭ ହୋଇଥିବା ବେଳେ ଆଗକୁ ବହୁ ରହସ୍ୟ ପଦାକୁ ଆସିବାର ସମ୍ଭାବନା ରହିଛି। ଏବେ ବ୍ୟାଙ୍କ ଶାଖାର ସିସି ଟିଭି ଟଙ୍କା ଠକେଇର ରହସ୍ୟ ଖୋଲିବ ବୋଲି ଚର୍ଚ୍ଚା ଚାଲିଛି।
