ସ୍ମାର୍ଟ ସିଟିରେ ହୁକାର ଆଧିପତ୍ୟ, ପୁଲିସ ନୀରବଦ୍ରଷ୍ଟ୍ରା

ରାଉରକେଲା୧୨/୧୨ (ସନ୍ଧାନ ନିଉଜ): ସ୍ମାର୍ଟ ସିଟି ରାଉରକେଲା ଦିନକୁ ଦିନ ନିଶା କାରବାର ବଢିବାରେ ଲାଗିଛି । ମଦ, ଗଂଜେଇ, ଡ୍ରଗ୍ସ ନିଶାରେ ଯୁବପିଢୀ ମାତିଥିବା ବେଳେ ଏବେ ବିଭିନ୍ନ ସ୍ଥାନରେ ହୁକା ବାର ଚାଲୁଥିବା ଏକ ଅନୁସନ୍ଧାନରୁ ଜାଣିବାକୁ ମିଳିଛି । ରାଉରକେଲାର କିଛି ସମ୍ଭ୍ରାନ୍ତ ହୋଟେଲରେ ହୁକାବାର ଚାଲୁଥିବା ବେଳେ, ଏହାପ୍ରତି ଆକର୍ଷିତ ହେଉଛନ୍ତି ଆଜିର ଯୁବପିଢୀ! ରାଉରକେଲା ପୁଲିସ ପକ୍ଷରୁ ବିଭିନ୍ନ ଅଂଚଳରେ ସାଂଧ୍ୟ ଓ ରାତ୍ରି କାଳୀନ ପାଟ୍ରୋଂଲି କରାଯାଉଥିଲେ ସୁଦ୍ଧା ନିଶାଗ୍ରସ୍ତ
ଉଦଭ୍ରାନ୍ତ ଯୁବପିଢୀଙ୍କୁ ପୁଲିସ ଲଗାମ ଦେବାରେ ବିଫଳ ସାବ୍ୟସ୍ତ ହୋଇଛି ବୋଲି ସାଧାରଣରେ ଆଲୋଚନା ହେଉଛି । ସହରର ଯୁବପିଢୀ ମାନଙ୍କ ମଧ୍ୟରେ ନିଶାସେବନକୁ ନେଇ ଅଂଚଳର ବୁଦ୍ଧିଜିବୀ ମହଲରେ ତ୍ରୀବ ପ୍ରତିକ୍ରିୟା ସୃଷ୍ଟି ହୋଇଛି । ଗଂଜେଇ, ହୁକା ଓ ଡ୍ରଗ୍ସ ନିଶାରେ ମାତିଛନ୍ତି ଯୁବପିଢୀ! ସହରରେ ଥିବା ବିଭିନ୍ନ ପରିତ୍ୟକ୍ତ ଆରଏସପି କ୍ୱାର୍ଟର, ବହୁ ଦିନରୁ ବନ୍ଦ ପଡ଼ିଥିବା ସ୍କୁଲ, ବିଭିନ୍ନ ପଡ଼ିଆ ପାଖ ରାସ୍ତା ସମେତ ଅନ୍ୟାନ ଅନ୍ଧାରୁଆ ଗଳିକନ୍ଦି ନିଶାଗ୍ରସ୍ତ ଯୁବପିଢୀଙ୍କଭୁସ୍ୱର୍ଗ ପାଲଟିଥିବା ଏକ ନିର୍ଭରଯୋଗ୍ୟ ସୂତ୍ରରୁ ଜଣାପଡ଼ିଛି । ସାଧାରଣତଃ ୧୮ରୁ ୩୦ ବର୍ଷ ବୟସର ଯୁବକ ମାନେ ସଂଜ ନଇଁଲେ ବିଭିନ୍ନ ଅନ୍ଧାରୁଆ ସ୍ଥାନରେ ମେଳି ଜମାଇ ନିଶାରେ ବୁଡ଼ି ରହୁଥିବା ଅଭିଯୋଗ ହୋଇଛି । ପୁଲିସର ନାଲିଆଖି ଏମାନଙ୍କ ପାଖରେ ପହଂଚିପାରୁନାହିଁ । ଫଳସ୍ୱରୂପ ଏମାନଙ୍କ ଉତ୍ପାତ ଦିନକୁ ଦିନ ବଢିବା ପରିବର୍ତେ ଥମିବାର ନାଁ ନେଉନାହିଁ । ନିଶାରେ ଚୁର ଯୁବପିଢୀ ମାନେ ସହରର ରାଜରାସ୍ତାରେ ଏଣେ ତେଣେ ଘୁରି ବୁଲିବା ସହ ଯିବା ଆସିବା କରୁଥିବା ଯୁବତୀ ଓ ମହିଳା ମାନଙ୍କୁ ଅଶାଳୀନ ବ୍ୟବହାର ପ୍ରଦର୍ଶନ କରିବାକୁ ମଧ୍ୟ ପଛଘୁଂଚା ଦେଉନାହାନ୍ତି । ଆହୁରି ମଧ୍ୟ ବିଭିନ୍ନ ପ୍ରକାର ନାମିଦାମୀ କମ୍ପାନୀର ବାଇକ ଚଳାଇ ରାସ୍ତାରେ ବିପଦଜ୍ଜନକ ଷ୍ଟଂଟ ପ୍ରଦର୍ଶନ କରୁଥିବାରୁ ରାସ୍ତାରେ ଯାତାୟତ ବୟସ୍କ ବ୍ୟକ୍ତି, ଶିଶୁ, ମହିଳାଙ୍କ ଜୀବନ ପ୍ରତି ବିପଦକୁ ଟାଣି ଆଣୁଥିବା ସ୍ପଷ୍ଟ ଭାବେ ପ୍ରତୀୟମାନ ହେଉଛି । ଏଣୁଏଦିଗରେ ବିଭିନ୍ନ ଥାନା ପୁଲିସ ପକ୍ଷରୁ ଦୃଢ କାର‌୍ୟ୍ୟାନୁଷ୍ଠାନ ନିଆଯିବା ଲାଗି ସାଧାରଣରେ ଦାବି ହୋଇଛି