ମାନବାଧିକାର ଆବେଦନ ପରେ କୋଏମ୍ବାଟୁର ଗଣଦୁଷ୍କର୍ମ ମାମଲାରେ ଦୋଷୀଙ୍କୁ ୨୦ ବର୍ଷରୁ ଆଜୀବନ କାରାଦଣ୍ଡ

କେନ୍ଦ୍ରାପଡା/କୋଏମ୍ବାଟୁର:  ୨୩ /୭/୨୬ (ସନ୍ଧାନ ନ୍ୟୁଜ)ମାନବାଧିକାର କର୍ମୀ ସାଗର କୁମାର ଜେନାଙ୍କ ଦ୍ୱାରା ଜାତୀୟ ମାନବାଧିକାର ଆୟୋଗ (NHRC) ନିକଟରେ ଦାଖଲ ହୋଇଥିବା ଏକ ଆବେଦନର ପରିପ୍ରେକ୍ଷୀରେ, ତାମିଲନାଡୁର କୋଏମ୍ବାଟୁର ବିମାନବନ୍ଦର ନିକଟରେ ଘଟିଥିବା ଚର୍ଚ୍ଚିତ ଗଣଦୁଷ୍କର୍ମ ମାମଲାର ତଦନ୍ତ ଶୀଘ୍ର ସମାପ୍ତ କରି ଅଭିଯୁକ୍ତମାନଙ୍କୁ ଦଣ୍ଡିତ କରାଯାଇଥିବା ସମ୍ପର୍କରେ କୋଏମ୍ବାଟୁର ପୁଲିସ ପକ୍ଷରୁ ସୂଚନା ଦିଆଯାଇଛି।
ସିଙ୍ଗାନାଲୁର ରେଞ୍ଜର ସହକାରୀ ପୁଲିସ କମିଶନରଙ୍କ ପକ୍ଷରୁ ସାଗର କୁମାର ଜେନାଙ୍କୁ ପଠାଯାଇଥିବା ପତ୍ରରେ ଉଲ୍ଲେଖ କରାଯାଇଛି ଯେ, ୨ ନଭେମ୍ବର ୨୦୨୫ ରେ କୋଏମ୍ବାଟୁର ଆନ୍ତର୍ଜାତୀୟ ବିମାନବନ୍ଦର ନିକଟରେ ଘଟିଥିବା ଗଣଦୁଷ୍କର୍ମ ଘଟଣାକୁ ନେଇ ସାଗର କୁମାର ଜେନା ୩ ନଭେମ୍ବର ୨୦୨୫ ରେ NHRC ନିକଟରେ ଆବେଦନ କରିଥିଲେ ଏବଂ ପୀଡ଼ିତାଙ୍କୁ ଶୀଘ୍ର ନ୍ୟାୟ ପ୍ରଦାନ କରିବାକୁ ଅନୁରୋଧ କରିଥିଲେ। ପୁଲିସ ସୂଚନା ଅନୁଯାୟୀ, ଘଟଣା ଦିନେ ମାମଲା ରୁଜୁ କରାଯାଇ ଏକ ସ୍ୱତନ୍ତ୍ର ତଦନ୍ତକାରୀ ଦଳ ଗଠନ କରାଯାଇଥିଲା। ବ୍ୟାପକ ତଦନ୍ତ ପରେ ପରଦିନ ସମସ୍ତ ତିନି ଅଭିଯୁକ୍ତଙ୍କୁ ଗିରଫ କରାଯାଇଥିଲା। କେବଳ ୨୮ ଦିନ ମଧ୍ୟରେ ତଦନ୍ତ ସମ୍ପୂର୍ଣ୍ଣ କରି ୧ ଡିସେମ୍ବର ୨୦୨୫ ରେ ଚାର୍ଜସିଟ୍ ଦାଖଲ କରାଯାଇଥିଲା। ପରବର୍ତ୍ତୀ ସମୟରେ ମାମଲାର ଦ୍ରୁତ ଶୁଣାଣି ହୋଇ ୭ ମାର୍ଚ୍ଚ ୨୦୨୬ ରେ ଅଦାଲତ ତିନିଜଣ ଅଭିଯୁକ୍ତଙ୍କୁ ଗଣଦୁଷ୍କର୍ମ ସହ ବିଭିନ୍ନ ଧାରାରେ ଦୋଷୀ ସାବ୍ୟସ୍ତ କରି ସର୍ବନିମ୍ନ ୨୦ ବର୍ଷରୁ ଆଜୀବନ କାରାଦଣ୍ଡ ପ୍ରଦାନ କରିଥିଲେ। ଏହା ସହ ପ୍ରତ୍ୟେକଙ୍କ ଉପରେ ₹୨,୫୦୦ ଜରିମାନା ମଧ୍ୟ ଲାଗୁ କରାଯାଇଥିଲା।  ଅଦାଲତ ରାୟରେ ତାମିଲନାଡୁ ସରକାରଙ୍କୁ ପୀଡ଼ିତାଙ୍କୁ ₹୭ ଲକ୍ଷ ଏବଂ ତାଙ୍କ ପୁରୁଷ ବନ୍ଧୁଙ୍କୁ ₹୨ ଲକ୍ଷ କ୍ଷତିପୂରଣ ପ୍ରଦାନ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ପତ୍ରର ଶେଷରେ ସହକାରୀ ପୁଲିସ କମିଶନର କହିଛନ୍ତି ଯେ, ପୀଡ଼ିତାଙ୍କୁ ନ୍ୟାୟ ମିଳିଥିବାରୁ ସାଗର କୁମାର ଜେନାଙ୍କ ଆବେଦନ ଉପରେ ଆଉ କୌଣସି ପରବର୍ତ୍ତୀ କାର୍ଯ୍ୟାନୁଷ୍ଠାନ ଆବଶ୍ୟକ ନଥିବାରୁ ମାମଲାକୁ ବନ୍ଦ କରାଯାଇଛି।