ନୟାଗଡ଼, ୨୪/୦୮(ସନ୍ଧାନ ନିୟୁଜ): ନିଜ ପୁଅକୁ ହାଣି ହତ୍ୟା କଲା ଜନ୍ମକଲା ମା’ । କଥାଟି ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଘଟଣାଟି ସତ । ସୂଚନା ଅନୂସାରେ ନୟାଗଡ଼ ଜିଲ୍ଲା ଦଶପଲ୍ଲା ଥାନା ଅନ୍ତର୍ଗତ ନାହାକ ପଡା ଗାଁରେ ଘଟିଛି ଏଭଳି ଅଭାବନୀୟ ଘଟଣା । ପୁଅ ମାନସିକ ବିକାରଗ୍ରସ୍ତ ଥିବା ବେଳେ ପ୍ରତିଦିନ ନିଜ ବୃଦ୍ଧ ମା’ ବାପାଙ୍କୁ ଅକଥନୀୟ ଅତ୍ୟାଚାର କରିଆସୁଥିଲା । ଯାହାକୁ ନେଇ ପ୍ରତିଦିନ ଘରେ ଝଗଡା ଲାଗିରହୁଥିଲା । ମାତ୍ର ଅତ୍ୟାଚାର ଅସହ୍ୟ ହୋଇପଡିବାରୁ ମା’ ନେଇଛି ଚରମ ନିଷ୍ପତି ।
ନାହାକ ପଡା ଗାଁର ମାନସିକ ବିକୃତ ବସନ୍ତ ବେହେରାଙ୍କୁ ତାଙ୍କର ମା’ ସର ବେହେରା କୌଣସି ଏକ ଧାରୁଆ ଅସ୍ତ୍ରରେ ହତ୍ୟା କରିଥିବା ଜଣା ପଡ଼ିଛି । ମାନସିକ ବିକୃତ ବସନ୍ତ ନିଜ ମା’ଙ୍କୁ ନିୟମିତ ଭାବେ ହଇରାଣ ହରକତ କରୁଥିଲେ । ତେବେ ଏଥିରେ ଅତିଷ୍ଠ ହୋଇ ଏଭଳି ଚରମ ନିଷ୍ପତି ନେଇଛନ୍ତି ବସନ୍ତଙ୍କ ମା’ ସର ବେହେରା ।
ଖୋଦ୍ ବସନ୍ତଙ୍କ ମା’ ନିଜ ଅପରାଧକୁ ମଧ୍ୟ ସ୍ୱୀକାର କରିଥିବା ଜଣା ପଡ଼ିଛି । ଘଟଣା ସମୟରେ ସରଙ୍କ ସ୍ୱାମୀ ଉପସ୍ଥିତ ଥିଲେ । ବସନ୍ତଙ୍କ ନିର୍ଯାତନାର ଶିକାର ହୋଇ ତାଙ୍କ ପତ୍ନୀ ମଧ୍ୟ ତାଙ୍କୁ ଘରୁ ଛାଡ଼ି ଚାଲି ଯାଇଥିଲେ ।ତେବେ ଏହି ହତ୍ୟାକାଣ୍ଡ ପରେ ବସନ୍ତଙ୍କ ମା’ ନିଜ ଅପରାଧ ସ୍ୱିକାର କରିଥିବା ଦଶପଲ୍ଲା ପୋଲିସ୍ ପକ୍ଷରୁ ସୂଚନା ମିଳିଛି।
