ବାଘୁଆ କଳାପଥର ଖାଦନରେ ମାଫିଆ ମାନେ ପୁଣି ସକ୍ରିୟ; କଳା ପଥର ଚୋରା ଚାଲାଣବେଳେ ୪ ଗାଡି ଜବତ

ଯାଜପୁର ଜିଲ୍ଲା ଧର୍ମଶାଳା ତହସିଲ ପକ୍ଷରୁ ଆଜି ଅଂଜିରା ମୌଜା ବାଘୁଆ ୧ନଂ କଳାପଥର ପାହାଡ଼ରୁ ୨ଟି କମ୍ପ୍ରେସର ଓ ଗୋଟିଏ ଟ୍ରାକ୍ଟର ଜବତ କରାଯାଇଥିବା ସହ ଚଢ଼େଇଧରା ନିକଟରୁ ଗୋଟିଏ ଟିପ୍ପର ଜବତ କରିଥିବାର ଜଣାପଡିଛି । ସୂଚନା ଅନୁଯାୟୀ ଆଜି ଧର୍ମଶାଳା ତହସିଲଦାର ସରୋଜ କୁମାର ପଣ୍ଡା, ଅତିରିକ୍ତ ତହସିଲଦାର ଦେବୀପ୍ରସାଦ ମହାନ୍ତି, ବଲରାମପୁର ରାଜସ୍ବ ସର୍କଲ-୨ ଆରଆଇ ସୁଶାନ୍ତ କୁମାର ସ୍ୱାଇଁ, କାଏମା ଆରଆଇ ବୀରଞ୍ଚି ନାରାୟଣ ବୋଇତେଇ, ଆରୁହା ଆରଆଇ ଜଗବନ୍ଧୁ ଜେନା, ନାକପୋଲ ଆରଆଇ ଚନ୍ଦନ ସାହୁ ପ୍ରମୁଖ ବାଘୁଆ ୧ନଂ ପାହାଡରେ ଆତର୍କିତ ଚଢ଼ାଉ କରିବା ଦ୍ୱାରା ବେଆଇନ ଭାବେ କଳାପଥର ବୋଝେଇ କରିଥିବା ଗୋଟିଏ ଟ୍ରାକ୍ଟର ଓ ଏହି କାର୍ଯ୍ୟରେ ଲାଗିଥିବା ଦୁଇଟି କମ୍ପ୍ରେସରକୁ ଜବତ କରିଥିଲେ । ସେହିପରି ଚଢ଼େଇଧରା ନିକଟରୁ ବେଆଇନ ଭାବେ କଳାପଥର ବୋଝେଇ କରି ଯାଉଥିବା ଏକ ଟିପ୍ପରକୁ ମଧ୍ୟ ଜବତ କରିଥିଲେ । କମ୍ପ୍ରେସର ଓ ଟ୍ରାକ୍ଟର ଠାରୁ ୬୦ ହଜାର ଟଙ୍କା ଜୋରିମାନା ଆଦାୟ କରି ଛାଡ଼ିଦେଇଥିବା ବେଳେ ଟିପ୍ପର ଟିକୁ ଚଢ଼େଇଧରା ଫାଣ୍ଡିରେ ରଖାଯାଇଥିବା ବିଭାଗ ପକ୍ଷରୁ ସୂଚନା ମିଳିଛି ।  ବାଘୁଆ ପାହାଡ଼ରେ ପ୍ରଶାସନ ପକ୍ଷରୁ ବାରମ୍ବାର ଚଢ଼ାଉ କରିବା ସତ୍ତ୍ୱେ ମଧ୍ୟ ମାଫିଆ ମାନେ ଖୁଲମ ଖୁଲା ପ୍ରଶାସନକୁ  ଚକମା ଦେଖାଇ କଳାପଥର ବୋହିବାରେ ସକ୍ରିୟ ଥିବା ଜଣାପଡୁଛି ।