କୋରାପୁଟ, : ୧୯/୧୧/୨୬ (ସନ୍ଧାନ ନ୍ୟୁଜ) ରାଷ୍ଟ୍ରଦୀପ ପ୍ରଚାର ସମିତିର ଆନୁକୂଳରେ କୋରାପୁଟ ସ୍ଥିତ ଶିଶୁ ବିଦ୍ୟାମନ୍ଦିର ପରିସରରେ ଏକ ପ୍ରେରଣାଦାୟୀ ‘ସେବା ସଂକଳ୍ପ ଅଭିଯାନ’ କାର୍ଯ୍ୟକ୍ରମ ଆନନ୍ଦଦାୟକ ପରିବେଶରେ ଅନୁଷ୍ଠିତ ହୋଇଯାଇଛି। ରାଷ୍ଟ୍ରଦୀପ ପ୍ରଚାର ସମିତିର ରାଜ୍ୟ ସମ୍ପାଦକ ଡକ୍ଟର ଜଳନ୍ଧର ତ୍ରିପାଠୀଙ୍କ ପୁଷ୍କଳ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଅଞ୍ଚଳର ବହୁ ମାନ୍ୟଗଣ୍ୟ ବ୍ୟକ୍ତି, ଶିକ୍ଷାବିତ୍ ଏବଂ ଛାତ୍ରଛାତ୍ରୀ ଯୋଗଦାନ କରିଥିଲେ। ଏହି ଅବସରରେ କୋରାପୁଟର ପ୍ରସିଦ୍ଧ ଶିକ୍ଷାବିତ୍, ଓଜସି ସୁବକ୍ତା, ଅଧ୍ୟାପକ ତଥା ଯଶସ୍ୱୀ ସାହିତ୍ୟିକ ଡକ୍ଟର ପ୍ରଦୀପ କୁମାର ସ୍ୱାଇଁଙ୍କୁ ତାଙ୍କର ଶିକ୍ଷା ଓ ସାହିତ୍ୟ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଏକ ଭବ୍ୟ ସମାରୋହରେ ସମ୍ମାନିତ କରାଯାଇଥିଲା। ମୁଖ୍ୟ ଅତିଥି ଭାବେ ଯୋଗଦେଇଥିବା ଜିଲ୍ଲା ଶିକ୍ଷାଧିକାରୀ ଶ୍ରୀଯୁକ୍ତ କରୁଣାକର ଭୁଏ ଏବଂ ବିଶିଷ୍ଟ ଅତିଥି ସନ୍ୟାସୀ ଆଚାର୍ଯ୍ୟ ମନୁ ମହାରାଜ ମିଳିତ ଭାବେ ଡକ୍ଟର ସ୍ୱାଇଁଙ୍କୁ ଉତ୍ତରୀୟ ଓ ମାନପତ୍ର ପ୍ରଦାନ କରି ସମ୍ବର୍ଦ୍ଧିତ କରିଥିଲେ। ସମାବେଶକୁ ସମ୍ବୋଧିତ କରି ଅତିଥିମାନେ କହିଥିଲେ ଯେ, ସେବା ମନୋଭାବ ଏବଂ ଶିକ୍ଷାର ପ୍ରସାର ଦ୍ୱାରା ହିଁ ଏକ ସୁସ୍ଥ ଓ ସଶକ୍ତ ରାଷ୍ଟ୍ର ଗଠନ କରାଯାଇପାରିବ। ଡକ୍ଟର ପ୍ରଦୀପ କୁମାର ସ୍ୱାଇଁଙ୍କ ଭଳି ବ୍ୟକ୍ତିତ୍ୱମାନଙ୍କର ସାଧନା ଆଜିର ଯୁବପିଢ଼ି ପାଇଁ ମାର୍ଗଦର୍ଶକ ସାଜିଛି ବୋଲି ବକ୍ତାମାନେ ମତବ୍ୟକ୍ତ କରିଥିଲେ। ଏହି କାର୍ଯ୍ୟକ୍ରମ ସ୍ଥାନୀୟ ବୁଦ୍ଧିଜୀବୀ ଓ ଶିକ୍ଷାପ୍ରେମୀମାନଙ୍କ ମଧ୍ୟରେ ବେଶ୍ ଆଦୃତ ଓ ପ୍ରଶଂସିତ ହୋଇପାରିଛି।
ରାଷ୍ଟ୍ରଦୀପ ପ୍ରଚାର ସମିତି ଆନୁକୂଳରେ ‘ସେବା ସଂକଳ୍ପ ଅଭିଯାନ’ କାର୍ଯ୍ୟକ୍ରମ ଅନୁଷ୍ଠିତ; ବିଶିଷ୍ଟ ଶିକ୍ଷାବିତ୍ ତଥା ସାହିତ୍ୟିକ ଡକ୍ଟର ପ୍ରଦୀପ କୁମାର ସ୍ୱାଇଁ ସମ୍ମାନିତ
|
November 19, 2026 |



