ବରଗଡ଼: (ସନ୍ଧାନ ନିୟୁଜ୍/ମାନସ ରାଉତ) ରାତିରେ ଶୋଇଥିବା ବେଳେ ଶିକ୍ଷକଙ୍କୁ ଟାଙ୍ଗିଆରେ ହାଣି ହତ୍ୟା କରାଯାଇଛି। ତାଙ୍କର ନାବାଳିକା ଝିଅଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଡାକ୍ତରଖାନରେ ଭର୍ତ୍ତି କରାଯାଇଛି। ଏପରି ଅଭାବନୀୟ ଘଟଣା ଘଟିଛି ବରଗଡ଼ ଜିଲ୍ଲା ଅମ୍ବାଭୋନା ଥାନା ଅନ୍ତର୍ଗତ ଖଇରିପଲି ଗାଁରେ।
ମୃତ ଶିକ୍ଷକ ହେଲେ ସାଧୁଚରଣ ପ୍ରଧାନ। ଏହି ଘଟଣାରେ ପୋଲିସ୍ ଜଣଙ୍କୁ ଅଟକ ରଖି ପଚରାଉଚରା କରୁଛି ଓ ଘଟଣାର ତଦନ୍ତ କରୁଛି। ତେବେ କେଉଁ ପରିସ୍ଥିତିରେ ବାପ, ଝିଅଙ୍କୁ ଆକ୍ରମଣ ହୋଇଛି ଏବଂ କିଏ ଏଭଳି କାଣ୍ଡ ଘଟାଇଛି ତାହା ସ୍ପଷ୍ଟ ହୋଇ ନାହିଁ।
ବରଗଡ଼ ଜିଲ୍ଲା ଅତାବିରା ବୋଳକ୍ ଅନ୍ତର୍ଗତ ସରଣ୍ଡାର ମୂଳା ବାସିନ୍ଦା ସାଧୁଚରଣ ଆମ୍ବଭୋନା ବ୍ଲକ ଖଇରପଲି ସ୍କୁଲରେ ଶିକ୍ଷକ ତଥା ସିଆରସି ଭାବେ କାର୍ଯ୍ୟ କରୁଥିଲେ। ସେ ସେହି ଗାଁରେ ନିଜର ଝିଅ ସହ ରହୁଥିଲେ। ଗତକାଲି ରାତିରେ ଘରେ ବାପାଝିଅ ଶୋଇଥିବା ବେଳେ କେହି ସେମାନଙ୍କୁ ଟାଙ୍ଗିଆରେ ଆକ୍ରମଣ କରିଥିଲା। ସାଧୁଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ତାଙ୍କ ଝିଅକୁ ଆଜି ସକାଳେ ଗୁରୁତର ଅବସ୍ଥାରେ ଉଦ୍ଧାର କରାଯାଇ ବରଗଡ଼ ଡାକ୍ତରଖାନରେ ଭର୍ତ୍ତି କରଯାଇଥିଲା। ତାଙ୍କର ସ୍ୱାସ୍ଥ୍ୟା ଅବସ୍ଥା ଅଧିକ ଖରାପ ହେବାରୁ ତାଙ୍କୁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
