ବିଜେପିକୁ ଚିହ୍ନି ରଖନ୍ତୁ, ଉଚିତ୍ ଜବାବ ଦିଅନ୍ତୁ; ଆମେ ନବ ବାବୁଙ୍କ ସ୍ୱପ୍ନ ପୂରଣ କରିବା: ପାଣ୍ଡିଆନ

ଝାରସୁଗୁଡା,(ସନ୍ଧାନ ନିୟୁଜ୍): ବିଜେଡି ପକ୍ଷରୁ ପ୍ରଚାର ମଙ୍ଗ ଧରିଛନ୍ତି ଭିକେ ପାଣ୍ଡିଆନ । ରାଜ୍ୟ ସାରା ମାରାଥନ ପ୍ରଚାର କରି ଦଳୀୟ ପ୍ରାର୍ଥୀଙ୍କୁ ଭୋଟ୍ ଦେବାକୁ ଅପିଲ୍ କରୁଛନ୍ତି । ଏହା ସହିତ ବିଜେପିକୁ ଶାଣିତ ସ୍ୱରରେ ଟାର୍ଗେଟ୍ ବି କରୁଛନ୍ତି । ଏହି କ୍ରମରେ ଆଜି ପାଣ୍ଡିଆନ ଝାରସୁଗୁଡାରେ ପ୍ରଚାର କରିଛନ୍ତି । ବିଧାନସଭା ପ୍ରାର୍ଥୀ ଦିପାଳୀ ଦାସ ଓ ଲୋକସଭା ପ୍ରାର୍ଥୀ ପରିଣିତା ମିଶ୍ରଙ୍କ ପାଇଁ ଭୋଟ୍ ମାଗିଛନ୍ତି । ନିର୍ବାଚନୀ ସଭାରେ ସ୍ୱର୍ଗତ ନବ ଦାସଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି ପାଣ୍ଡିଆନ୍ । ସେ କହିଛନ୍ତି ନବ ଦାସ ଝାରସୁଗୁଡା ପାଇଁ ବହୁତ କିଛି କରିଛନ୍ତି । ଦିପାଳୀଙ୍କ ବାପା ଏଠି ନାହାନ୍ତି ଆପଣମାନେ ତାଙ୍କୁ ଆଶୀର୍ବାଦ କରିବେ । ଏସଏଚଜି ମହିଳାଙ୍କୁ ବଡ଼ ଉପହାର ଦେଇଛନ୍ତି ମୁଖ୍ୟମନ୍ତ୍ରୀ । ସେମାନଙ୍କୁ ପେନସନ ଦେବାକୁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ଆପଣ ପେନସନ ପାଇଁ କହିଥିଲେ, କଥା ରଖିଲେ ମୁଖ୍ୟମନ୍ତ୍ରୀ ବୋଲି ପାଣ୍ଡିଆନ କହିଛନ୍ତି ।ବିଜେପିକୁ ଟାର୍ଗେଟ୍ କରି ଭି.କେ. ପାଣ୍ଡିଆନ୍ କହିଛନ୍ତି, ବିରୋଧୀ ନେତା ମିଥ୍ୟା ପ୍ରଚାର କହି ଭୋଟ୍ ନେବେ । ଗ୍ୟାସ୍ ଓ ପେଟ୍ରୋଲ ଦର କମିବ ବୋଲି କହିଥିଲେ, କମିଲା କି ? ଦୁଇ କୋଟି ରୋଜଗାର ଦେଲେ କି ? ଏମାନଙ୍କୁ ଆପଣ ଚିହ୍ନନ୍ତୁ, ଉଚିତ ଜବାବ ଦିଅନ୍ତୁ । ଝାରସୁଗୁଡାକୁ ଆଗେଇ ନେବା । ନବ ବାବୁଙ୍କ ଯାହା ସ୍ୱପ୍ନ ଥିଲା ତାକୁ ପୂରଣ କରିବା ବୋଲି ପାଣ୍ଡିଆନ କହିଛନ୍ତି ।ଝାରସୁଗୁଡାରେ ପ୍ରଚାର ସାରି ଭି.କେ. ପାଣ୍ଡିଆନ ବ୍ରଜରାଜନଗର ନିର୍ବାଚନ ମଣ୍ଡଳୀରେ ବିଧାୟିକା ପ୍ରାର୍ଥୀ ଅଳକା ମହାନ୍ତିଙ୍କ ପାଇଁ ପ୍ରଚାର କରିବେ । ଏହାପରେ ଲଖନପୁର ବ୍ଲକ ପଞ୍ଚଗାଁରେ ଜନସଭାକୁ ସମ୍ବୋଧିତ କରିବେ ପାଣ୍ଡିଆନ୍ । ଅନ୍ୟପଟେ ଆଜି ବିଜେପିର ମଧ୍ୟ ମାରାଥନ ପ୍ରଚାର ରହିଛି ।