୫-ଟିର ପ୍ରଭାବ.ଚୁପ ରହିଲା ପୁଲିସ,ଗାଳି ଶୁଣିଲେ ତହସିଲଦାର

ଧାମନଗର୧୮ା୧୦-ଧାମନଗରରେ ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇ ପଡିଲାଣି । ଖୋଦ ମାଜିଷ୍ଟ୍ରେଟ ତଥା ତହସିଲଦାରଙ୍କୁ ପୁଲିସ ଉପସ୍ଥିତିରେ ଜଣେ ଯୁବକ ଅତି ଅସଭ୍ୟ ଭାଷାରେ ଗାଲି ଗୁଲଜ କରୁଥିବା ବେଳେ ସେଠାରେ ପୁଲିସ ନିରବଦଷ୍ଟା ସାଜିଛି । ଯେଉଁଠି ଖୋଦ ମାଜିଷ୍ଟ୍ରେଟ ସୁରକ୍ଷିତ ନୁହନ୍ତି ସେଠାରେ ସାଧାରଣ ଲୋକ କେତେ ସୁରକ୍ଷିତ ତାହାକୁ ନେଇ ବୃଦ୍ଧିଜିବୀ ମାନେ ପ୍ରଶ୍ନ ଉଠାଇଛନ୍ତି । ପ୍ରକାଶ ଯେ ଗତକାଲି ରାତି ପ୍ରାୟ ୯ଟା ସମୟରେ ଧାମନଗର ତହସିଲଦାର ତଥା ଭାରପ୍ରାପ୍ତ ବିଡିଓ ଦୁର୍ଗାଚରଣ ମୁର୍ମୁ ଏକ ସରକାରୀ ମିଟିଙ୍ଗ ସାରି ତାଙ୍କ ସରକାରୀ କ୍ୱାର୍ଟରକୁ ଫେରୁଥିଲେ । ସେହି ସମୟରେ କେତେକ ଯୁବକ ବ୍ଲକ କଲୋନୀ ଫାଟକ ସମ୍ମୁଖରେ ମଦ୍ୟପାନ କରି ହୋ-ହାଲ୍ଲା ହେଉଥିଲେ । ତହସିଲଦାର ପହଂଚି ସେମାନଙ୍କୁ ବାରଣ କରିଥିଲେ । ହେଲେ ଯୁବକମାନେ ତାଙ୍କ କଥା ଶୁଣିନଥିଲେ । ଫଳରେ ତହସିଲଦାର ପୁଲିସକୁ ଫୋନ କରି ଡକାଇଥିଲେ । ପୁଲିସକୁ ଦେଖି ଅନ୍ୟ ମାନେ ଘଟଣାସ୍ଥଳରୁ ପଳାଇଥିବା ବେଳେ ସ୍ଥାନୀୟ ଅଂଚଳର ଯୁବକ ରାଜେଶ ମହାନ୍ତି ସେଠାରେ ରହି ପୁଲିସ ଉପସ୍ଥିତିରେ ତହସିଲଦାରଙ୍କୁ ଅତି ଅସଭ୍ୟ ଭାଷାରେ ଗାଲି ଗୁଲଜ କରିଥିଲେ । ଏପରିକି ସଂପୃକ୍ତ ଯୁବକ ଧାମନଗର ଅଂଚଳର ଜଣେ ପ୍ରଭାବଶାଳୀ ନେତାଙ୍କ ନାମ ନେଇ ତୋ ଚାକିରି ଖାଇବି ବୋଲି କହି ତହସିଲଦାରଙ୍କୁ ଧମକାଇବା ଭିଡିଓ ଆଜି ବିଭିନ୍ନ ସୋସିଆଲ ମିଡିଆରେ ଭାଇରାଲ ହେଉଥିବା ଦେଖାଦେଇଛି । ହେଲେ ସଂପୃକ୍ତ ଯୁବକ ପୁଲିସ ଉପସ୍ଥିତିରେ ତହସିଲଦାରଙ୍କୁ ଗାଳି କରୁଥିବା ସମୟରେ ପୁଲିସ କର୍ମଚାରୀମାନେ ସେଠାରେ ଠିଆ ହୋଇ ନିରବଦଷ୍ଟା ସାଜିଥିବା ଏହି ଭିଡିଓରେ ମଧ୍ୟ ଦେଖିବାକୁ ମିଳିଥିଲା । ତେବେ ଏନେଇ ତହସିଲଦାର ଥାନାରେ ସଂପୃକ୍ତ ଯୁବକଙ୍କ ନାମରେ ଏକ ଅଭିଯୋଗ କରିବାରୁ ପୁଲିସ ଥାନାରେ କେଶ ନଂ-୨୨୩/୧୯ରେ ଏକ ମାମଲା ରୁଜୁ କରି ଚୁପ ହୋଇ ବସିଛି । ଏହାର ପ୍ରତିବାଦରେ ଆଜି ଧାମନଗର ତହସିଲ ଓ ବ୍ଲକ କର୍ମଚାରୀମାନେ ଫାଟକ ନିକଟରେ ପ୍ରତିକ ଧାରଣାରେ ବସି କଲମ ଛାଡ ଆନ୍ଦୋଳନ କରିଥିଲେ । ଯେ ପର୍ଯ୍ୟନ୍ତ ଅଭିଯୁକ୍ତକୁ ଗିରଫ କରାନଯାଇଛି ସେ ପର୍ଯ୍ୟନ୍ତ ଏହି ଆନ୍ଦୋଳନ ଜାରି ରହିବ ବୋଲି ଧାରଣାରତ କର୍ମଚାରୀମାନେ ଚେତାବନୀ ଦେଇଛନ୍ତି । ଜଣେ ସରକାରୀ ପଦସ୍ଥ ଅଫିସଙ୍କୁ ପୁଲିସ ଉପସ୍ଥିତିରେ ଗାଳି ଗୁଲଜ ଓ ତାଙ୍କ ଚାକିରି ଖାଇବାର ଧମକ ଏହା ଏକ ଅଗଣତ୍ରାନ୍ତ୍ରିକ ଦର୍ଶାଇ ଭାରତୀୟ ଜନତା ପାର୍ଟି ପକ୍ଷରୁ ଏହାକୁ ଘୋର ବିରୋଧ ଓ ଘଟଣାର ଦୃଢ ନିନ୍ଦା କରିଛି । ଏହି ପ୍ରତିକ ଧାରଣାକୁ ଦଳ ସମର୍ଥନ କରି ଏଥିରେ ଦଳର ଜିଲା ସାଧାରଣ ସଂପାଦକ ଅଶୋକ କୁମାର ପୁହାଣ, ଜିଲା ଉପସଭାପତି ଚତ୍ରୁଭୂଜ ନାୟକ, ସରପଂଚ ନିମାଇଁ ନାୟକ, ରାଜେନ୍ଦ୍ର ସାହୁ, ଗୟାଧର ନାୟକ ଓ ପ୍ରଫୁଲ୍ଲ ପାତ୍ର, ଶ୍ରୀକାନ୍ତ ନାୟକ ପ୍ରମୁଖ ସାମିଲ ହୋଇ ଧାରଣାରେ ବସିଥିଲେ । ଏହି ଘଟଣାକୁ ନେଇ ତହସିଲ ଓ ବ୍ଲକ କର୍ମଚାରୀମାନେ ନିଜକୁ ସୁରକ୍ଷିତ ମଣୁନଥିବା ବେଳେ ଅଧିକାଂଶ ସମୟରେ ଏହି ଦୁଇ କାର୍ଯ୍ୟାଳୟରେ ମଦପ୍ୟଙ୍କ ଅବାଦରେ ପ୍ରବେଶ କରି କର୍ମଚାରୀଙ୍କୁ ଆଶାଳିନ ବ୍ୟବହାର କରୁଥିବା ମଧ୍ୟ ଅଭିଯୋଗ ହୋଇଛି । ଆଜି ଏହି ଧାରଣା ଯୋଗୁଁ ଉଭୟ କାର୍ଯ୍ୟାଳୟକୁ ଆସୁଥିବା ସାଧାରଣ ଲୋକ ନିଜର କାମ ନକରିପାରି ନିରାଶ ହୋଇ ଘରକୁ ଫେରିଥିଲେ । ଅପରପକ୍ଷେ ପୁଲିସ ଉପସ୍ଥିତିରେ ଜଣେ ତହସିଲଦାରଙ୍କୁ ମଦ୍ୟପ ଯୁବକଙ୍କ ଗାଳିଗୁଲଜକୁ ଧାମନଗର ଅଂଚଳର ବୁଦ୍ଧିଜିବୀ ଓ ସାଧାରଣ ନାଗରିକ ନାପସଂନ୍ଦ କରିଛନ୍ତି । ଯେଉଁଠି ଜଣେ ମାଜିଷ୍ଟେଟ ସୁରକ୍ଷିତ ନୁହନ୍ତି ସେଠାରେ ସାଧାରଣ ଲୋକ କେତେ ସୁରକ୍ଷିତ ତାହାକୁ ନେଇ ବଡ ପ୍ରଶ୍ନବାଚୀ ସୃଷ୍ଟି କରିଛି । ପ୍ରକାଶ ଥାଉକି ନିକଟରେ ରାଜ୍ୟ ସରକାର ୫-ଟି ଯୋଜନାରେ ଥାନାକୁ ଆସୁଥିବା ପ୍ରତ୍ୟେକ ବ୍ୟକ୍ତିଙ୍କୁ ଉତମ ବ୍ୟବହାର ପ୍ରଦର୍ଶନ କରାଯିବା ସହ ବୃତିଗତ ଓ ସେବା ମନୋଭାବ ନେଇ ସେମାନଙ୍କ ସମସ୍ୟା ସମାଧାନ ପାଇଁ ପଦକ୍ଷେପ ଗ୍ରହଣ କରାଯିବା ସରକାରଙ୍କ ନିର୍ଦ୍ଦେଶ ଥିବା ବେଳେ ପୁଲିସ ଏହି ନିର୍ଦ୍ଦେଶକୁ ଗ୍ରହଣ କରି ନିଜ ଉପରକୁ ଦୋଷ ନନେଇ ଏବଂ ନିଜ ଚାକିରିକୁ ସୁରକ୍ଷିତ ରଖି ଅଭିଯୁକ୍ତକୁ ଧରିଲାନାହିଁ ବୋଲି ସାଧାରଣରେ ମତ ପ୍ରକାଶ ପାଇଛି । ଯାହାଫଳରେ ୫-ଟି ପ୍ରଭାବରେ ଚୁପ ରହିଲା ପୁଲିସ, ଗାଳି ଶୁଣିଲେ ତହସିଲଦାର ବୋଲି କୁହାକୁହି ହେଉଛନ୍ତି ।