ଯାଜପୁର,  ୧/୬(ସନ୍ଧାନ ନିୟୁଜ୍/ମାନସ ରାଉତ) – ଯାଜପୁର ଜିଲା ବଡ଼ଚଣା ବ୍ଲକ୍ ଅନ୍ତର୍ଗତ ଚଣ୍ଡୀଖୋଲ ବଜାର ଅବସ୍ଥିତ। ବଡ଼ଚଣା, ଧର୍ମଶାଳା ନିର୍ବାଚନମଣ୍ଡଳୀ ସମେତ ଯାଜପୁର ଜିଲା ଓ ବିଭିନ୍ନ ଜିଲାର ରାଜଧାନୀ ଭୁବନେଶ୍ୱର ସହିତ ସଂଯୋଗୀକରଣର ଏହା ଏକ ପ୍ରମୁଖ ଗନ୍ତବ୍ୟସ୍ଥଳୀ ଅଟେ। କ୍ରମବର୍ଦ୍ଧିଷ୍ଣୁ ଲୋକସଂଖ୍ୟା ବୃଦ୍ଧିପାଉଥିବାରୁ ଚଣ୍ଡୀଖୋଲର ଗୁରୁତ୍ୱ ବଢ଼ିଛି। ରାଜ୍ୟର ୩ଟି ଜାତୀୟ ରାଜପଥ ଓ ରେଳପଥର ସଙ୍ଗମସ୍ଥଳ ଚଣ୍ଡୀଖୋଲ ସମସ୍ତ ଦୃଷ୍ଟିକୋଣରୁ ଦେଶ ଓ ରାଜ୍ୟର ଏକ ଗୁରୁତ୍ୱପୂର୍ଣ୍ଣ ଅଞ୍ଚଳ ଅଟେ। ମହାବିନାୟକ ଚଣ୍ଡୀଖୋଲଠାରୁ ରତ୍ନଗିରି, ଉଦୟଗିରି ଓ ଲଳିତଗିରି, ହୀରକ ତ୍ରିଭୂଜ ଦେଶବିଦେଶର ପର୍ଯ୍ୟଟନ ମାନଚିତ୍ରରେ ସ୍ଥାନ ପାଇ ଚଣ୍ଡୀଖୋଲର ଗୁରୁତ୍ୱ ସୁଦୂରପ୍ରସାରୀ ହୋଇଛି। ଏଠାରେ ଜିଲାର ଆଞ୍ଚଳିକ ପରିବହନ କେନ୍ଦ୍ର, ଆଞ୍ଚଳିକ କୃଷି ବିଜ୍ଞାନ କେନ୍ଦ୍ର ଜଳସେଚନ ସୁପରିଟେଣ୍ଡେଣ୍ଟ କାର୍ଯ୍ୟାଳୟ, ଟ୍ରମାକେୟାର ସେଣ୍ଟର, ଟ୍ରାଫିକ୍ ଥାନା ଓ ପୂର୍ତ୍ତ ବିଭାଗର ବହୁ ଗୁରୁତ୍ୱପୂର୍ଣ୍ଣ କାର୍ଯ୍ୟାଳୟ ସହ ୩ଟି ମହାବିଦ୍ୟାଳୟ, ଉତ୍କଳ ବିଶ୍ୱବିଦ୍ୟାଳୟର ଦ୍ୱିତୀୟ କ୍ୟାମ୍ପସ୍, ବହୁ ଜାତୀୟକରଣ ବ୍ୟାଙ୍କ ସହ କଳିଙ୍ଗନଗର ପାରାଦ୍ୱୀପ ବନ୍ଦର ଶିଳ୍ପ କରିଡ଼ର ଏବଂ ନିର୍ମାଣଧୀନ ହରିଦାସପୁର-ପାରାଦ୍ୱୀପ ରେଳପଥର ସଙ୍ଗମସ୍ଥଳ ହୋଇଥିବାରୁ ଚଣ୍ଡୀଖୋଲର ସୁଦୃଢ଼ ଭିତ୍ତିଭୂମି ରହିଅଛି। ଏହିସବୁ କାରଣରୁ ଚଣ୍ଡୀଖୋଲକୁ ନୂତନ ସବ୍-ଡିଭିଜନ ମହକୁମା ଦାବି ନେଇ ଦୀର୍ଘ ୪ ବର୍ଷ ହେବ ବଡ଼ଚଣା ଓ ଧର୍ମଶାଳା ଅଞ୍ଚଳର ନିର୍ବାଚିତ ଲୋକପ୍ରତିନିଧି, ନାଗରିକ, ବୁଦ୍ଧିଜୀବୀ, ବିଭିନ୍ନ ଗଣସଙ୍ଗଠନ କର୍ମକର୍ତ୍ତାଙ୍କ ପକ୍ଷରୁ ଗଣଧାରଣା, ପ୍ରତିବାଦ ସଭା, ବିକ୍ଷୋଭ ଶୋଭାଯାତ୍ରା, ଚଣ୍ଡୀଖୋଲ ବନ୍ଦ ପ୍ରଭୃତି କାର୍ଯ୍ୟମାନ ଅନୁଷ୍ଠିତ ହୋଇଯାଇଛି। ଏଠାରେ ସୂଚନାଯୋଗ୍ୟ ଯେ, ସାଧାରଣ ଲୋକଙ୍କ ପାଖରେ ପ୍ରଶାସନିକ ସୁବିଧା ସୁଯୋଗ ପହଞ୍ଚାଇବା ପାଇଁ ୭୦ ଦଶକରେ ଓଡ଼ିଶାର ସରକାରଙ୍କ ପକ୍ଷରୁ ଜଷ୍ଟିସ୍ ଆର.କେ.ଦାସ କମିଶନ ଗଠନ କରାଯାଇଥିଲା। ୧୯୭୫ ମସିହାରେ ଏହି କମିଶନ ପ୍ରଶାସନିକ ସୁବିଧା ସୁଯୋଗର ବିକେନ୍ଦ୍ରୀକରଣ ନିମନ୍ତେ ଚଣ୍ଡୀଖୋଲକୁ ମହକୁମା କରାଯିବା ପାଇଁ ପ୍ରସ୍ତାବ ଦିଆଯାଇଥିଲା। ଏପରିକି ପ୍ରବାଦପୁରୁଷ ବିଜୁ ବାବୁଙ୍କ ପ୍ରତିଶ୍ରୁତି ଓ ବର୍ତ୍ତମାନର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସର୍ବସାଧାରଣ ଜନସଭାରେ ଦୁଇ ଦୁଇଥର ପ୍ରତିଶ୍ରୁତି, ରାଜ୍ୟ ବିଧାନସଭାରେ ରାଜସ୍ୱ ମନ୍ତ୍ରୀଙ୍କ ଚଣ୍ଡୀଖୋଲଠାରେ ସବ୍-ଡିଭିଜନ ସଂକ୍ରାନ୍ତୀୟ ଉତ୍ତର ପ୍ରଭୃତି ସତ୍ତ୍ୱେ ଚଣ୍ଡୀଖୋଲରେ ନୂତନ ସବ୍-ଡିଭିଜନ କରାନଯିବା ଏହି ଅଞ୍ଚଳର ବିକାଶ ଓ ନ୍ୟାର୍ଯ୍ୟ ଦାବି ପ୍ରତି ସରକାର ଉପେକ୍ଷା କରୁଥିବାରୁ ଚଣ୍ଡୀଖୋଲକୁ ସବ୍-ଡିଭିଜନର ସଦରମହକୁମା ଦାବି କରି ଗୁରୁବାର ଦିନ ଚଣ୍ଡୀଖୋଲର ମିଳିତ କ୍ରିୟାନୁଷ୍ଠାନ କମିଟିର ରମାକାନ୍ତ ରାଉତ, ପ୍ରମୋଦ କୁମାର ଜେନା, ପ୍ରଦୀପ କୁମାର ଧଳ, ଅକ୍ଷୟ କୁମାର ସାମଲ ପ୍ରଭୃତି ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି। ଏହା ସହିତ ଏହି କମିଟି ରାଜ୍ୟ ମୁଖ୍ୟମନ୍ତ୍ରୀ, ଶାସନ ସଚିବ ଓ ରାଜସ୍ୱ ବିଭାଗ, ବିଭାଗୀୟ ସଚିବମାନଙ୍କୁ ଚଣ୍ଡୀଖୋଲକୁ ସବ୍-ଡିଭିଜନର ସଦରମହକୁମା ଦାବି ନେଇ ଦାବିପତ୍ର ପ୍ରଦାନ କରିଛନ୍ତି। ଯଦି ଆସନ୍ତା ୭ ଦିନ ଭିତରେ ସରକାର କୌଣସି ପଦକ୍ଷେପ ନନିଅନ୍ତି ଧର୍ମଶାଳା ଓ ବଡ଼ଚଣା ନିର୍ବାଚନମଣ୍ଡଳୀର ସାଧାରଣ ଜନତା ଏବଂ ଚଣ୍ଡୀଖୋଲର ମିଳିତ କ୍ରିୟାନୁଷ୍ଠାନ କମିଟି ଚଣ୍ଡୀଖୋଲ ଦେଇ ଯାଇଥିବା ୩ ଗୋଟି ଜାତୀୟ ରାଜପଥ ଓ ରେଳପଥକୁ ଦୀର୍ଘଦିନ ଧରି ଅବରୋଧ କରିବେ ବୋଲି ଚେତାବନୀ ଦେଇଛନ୍ତି।

share and subscribed