ଯାଜପୁର, ୦୨/୦୬/:(ସନ୍ଧନ ନ୍ୟୁଜ )ପ୍ରଶାସନିକ ସ୍ୱଚ୍ଛତା ଏବଂ ଜନସ୍ୱାର୍ଥ ସୁରକ୍ଷାକୁ ପ୍ରାଥମିକତା ଦେଇ ଯାଜପୁର ଜିଲ୍ଲା ପ୍ରଶାସନ ପକ୍ଷରୁ ଆଜି ଅତ୍ୟନ୍ତ ସ୍ୱଚ୍ଛ ଓ ନିରପେକ୍ଷ ଭାବେ ଅବକାରୀ ଦୋକାନ ବଣ୍ଟନ ଲଟେରି ପ୍ରକ୍ରିୟା ଅନୁଷ୍ଠିତ ହୋଇଯାଇଛି। ସ୍ଥାନୀୟ ଗୌତମ ବୁଦ୍ଧ ସଂସ୍କୃତି ଭବନରେ ଜିଲ୍ଲାପାଳ ଅମ୍ବର କୁମାର କରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆୟୋଜିତ ଏହି କାର୍ଯ୍ୟକ୍ରମ ସ୍ଥାନୀୟ ପ୍ରଶାସନର କାର୍ଯ୍ୟଦକ୍ଷତାର ଏକ ବଳିଷ୍ଠ ନିଦର୍ଶନ ପାଲଟିଛି,
ପ୍ରକ୍ରିୟାରେ ସର୍ବୋଚ୍ଚ ସ୍ୱଚ୍ଛତା ରକ୍ଷା କରିବା ନିମନ୍ତେ ପ୍ରଶାସନ ପକ୍ଷରୁ ଅତ୍ୟାଧୁନିକ ବ୍ୟବସ୍ଥା ଗ୍ରହଣ କରାଯାଇଥିଲା। ଲଟେରି ଚୟନ ସମୟରେ ଅଧିକାରୀମାନଙ୍କ ଆଖିରେ କଳାପଟି ବାନ୍ଧି ଟୋକନ ଉଠାଇବା ପ୍ରକ୍ରିୟା ସମଗ୍ର ବ୍ୟବସ୍ଥାକୁ ଏକ ଉଚ୍ଚ ସ୍ତରୀୟ ନିରପେକ୍ଷତାର ମାନ୍ୟତା ପ୍ରଦାନ କରିଥିଲା।
ଆଇଏମଏଫଏଲ୍ (ଅଫ୍): ୪୨ଟି ଦୋକାନ ପାଇଁ ୯୦୫ ଜଣ ଆଶାୟୀ ପ୍ରାର୍ଥୀ।
କଣ୍ଟ୍ରି ଲିକ୍ୟୁର: ୧୬ଟି ଦୋକାନ ପାଇଁ ୪୮୭ ଜଣ ଆଶାୟୀ ପ୍ରାର୍ଥୀ,
କାର୍ଯ୍ୟକ୍ରମକୁ ତ୍ରୁଟିଶୂନ୍ୟ କରିବା ପାଇଁ ସ୍ଥାନକୁ ସିସିଟିଭି ନିୟନ୍ତ୍ରଣରେ ରଖାଯିବା ସହ ସମ୍ପୂର୍ଣ୍ଣ ପ୍ରକ୍ରିୟାର ଭିଡିଓ ରେକର୍ଡିଂ କରାଯାଇଛି। ଫଳାଫଳକୁ ତୁରନ୍ତ ଇ-ଅବକାରୀ ପୋର୍ଟାଲରେ ଅପଲୋଡ୍ କରାଯାଇ ସାଧାରଣ ସୂଚନା ନିମନ୍ତେ ଉପଲବ୍ଧ କରାଯାଇଛି, ଯାହାକି ଡିଜିଟାଲ୍ ସ୍ୱଚ୍ଛତା ପ୍ରତି ପ୍ରଶାସନର ପ୍ରତିବଦ୍ଧତାକୁ ଦର୍ଶାଉଛି।
”ପ୍ରଶାସନିକ ପ୍ରକ୍ରିୟାରେ ସ୍ୱଚ୍ଛତା ହିଁ ଆମର ମୁଖ୍ୟ ଲକ୍ଷ୍ୟ। ସମସ୍ତ ଅଧିକାରୀ ଓ କର୍ମଚାରୀଙ୍କ ନିଷ୍ଠାପର ଉଦ୍ୟମ ଯୋଗୁଁ ଆଜିର ଲଟେରି ପ୍ରକ୍ରିୟା ଶାନ୍ତିପୂର୍ଣ୍ଣ ଓ ସୁବ୍ୟବସ୍ଥିତ ଭାବେ ସମ୍ପନ୍ନ ହୋଇପାରିଛି,” ବୋଲି ଜିଲ୍ଲାପାଳ ଶ୍ରୀ କର ମତବ୍ୟକ୍ତ କରିଛନ୍ତି।
ଏହି ଗୁରୁତ୍ୱପୂର୍ଣ୍ଣ ପ୍ରକ୍ରିୟାରେ ଅତିରିକ୍ତ ଜିଲ୍ଲାପାଳ (ରାଜସ୍ୱ) ଶିବାନନ୍ଦ ସ୍ୱାଇଁ, ଉପଜିଲ୍ଲାପାଳ ତାପସ ରଞ୍ଜନ ଦେହୁରୀଙ୍କ ସମେତ ଜିଲ୍ଲା ପୋଲିସ ଏବଂ ଅବକାରୀ ବିଭାଗର ବରିଷ୍ଠ ଅଧିକାରୀବୃନ୍ଦ ଉପସ୍ଥିତ ରହି ତଦାରଖ କରିଥିଲେ। ସୂଚନାଯୋଗ୍ୟ ଯେ, ମନୋନୀତ ଆବେଦନକାରୀଙ୍କ ନଥିପତ୍ର ଯାଞ୍ଚ ଏବଂ ନିର୍ଦ୍ଧାରିତ ଶୁଳ୍କ ପ୍ରଦାନ ପରେ ହିଁ ସେମାନଙ୍କୁ ଆନୁଷ୍ଠାନିକ ଭାବେ ଲାଇସେନ୍ସ ପ୍ରଦାନ କରାଯିବ।
