ଭଦ୍ରକ, ୨୧/୮ (ସନ୍ଧାନ ନିୟୁଜ) ବିଜୁ ଜନତା ଦଳର ଅନ୍ୟତମ ହେଭିୱେଟ୍ ଯୁବନେତା ଅସିତ ପଟ୍ଟନାୟକ(ବୁଲୁ) ରାଜ୍ୟ ମତ୍ସ୍ୟ ବିକାଶ ପରିଷଦର ଅଧ୍ୟକ୍ଷ ଭାବେ ମନୋନୀତ ହୋଇଛନ୍ତି । ଏ ସମ୍ପର୍କରେ ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି । ମୁଖ୍ୟମନ୍ତ୍ରୀଙ୍କ ଏହି ଘୋଷଣା ପରେ ଭଦ୍ରକରେ ମିଶ୍ର ପ୍ରତିକ୍ରିୟା ପ୍ରକାଶ ପାଇଛି । ବୁଲୁଙ୍କ ଏହି ନିଯୁକ୍ତିକୁ ଭଦ୍ରକର ବିଭିନ୍ନ ଅଞ୍ଚଳରେ ସ୍ୱାଗତ କରାଯାଇଛି । ଚରମ୍ପା ଠାରେ ଶହଶହ ବୁଲୁଙ୍କ ସମର୍ଥକ ଏହି ନୂତନ ନିଯୁକ୍ତିକୁ ବାଣ ଫୁଟାଇ ସ୍ୱାଗତ କରିଥିବାବେଳେ ପୁରୁଣାବଜାର ଠାରେ ମଧ୍ୟ ଅନୁରୂପ ଚିତ୍ର ଦେଖିବାକୁ ମିଳିଛି । ପୁରୁଣାବଜାର ହେଲାସାହି ଠାରେ ପୁରୁଣାବଜାର ଯୁବସଂଘ ପକ୍ଷରୁ ବିଜୁ ଜନତା ଦଳ ର ନଗର ସଭାପତି ସେକ୍ ଇସଲାମ, ନସିରୁଦ୍ଦିନ ଖାନ, ଫରିୟାଜ ଖାନ, ମୁସ୍ତାକ ଅଲ୍ଲୀ, ସେକ୍ ଏହେସାନ, ସେକ ସନୱାର ହୋସେନ, ସେକ୍ ରାଜୁ, ସେକ ମୁକ୍ତିୟାର, ମଲ୍ଲିକ ବାବର, ସେକ ମନୱାର ପ୍ରମୁଖ ଆତସବାଜି ପ୍ରଦର୍ଶନ କରିବା ସହ ବୁଲୁଙ୍କ ନିଯୁକ୍ତିକୁ ସ୍ୱାଗତ କରିଥିଲେ । ଏଠାରେ ସୂଚନାଯୋଗ୍ୟ ଗତ ବିଧାନସଭା ନିର୍ବାଚନ ପାଇଁ ଭଦ୍ରକ ବିଧାନସଭା କ୍ଷେତ୍ରରୁ ବୁଲୁ ଟିକେଟ ଆଶାୟୀ ଥିଲେ । କିନ୍ତୁ ତାଙ୍କୁ ଦଳୀୟ ଟିକେଟ ମିଳିନଥିଲା, ଯାହାକି ତାଙ୍କ ସମର୍ଥକଙ୍କୁ ନିରାଶ କରିଥିଲା । କିନ୍ତୁ ବୁଲୁଙ୍କ ନୂତନ ନିଯୁକ୍ତି ତାଙ୍କ ସମର୍ଥକଙ୍କୁ ଉତ୍ସାହିତ କରିଛି ।
Report- Ramesh Nayak
