ବାରିପଦା, ୧୬/୦୭/୨୦ (ସନ୍ଧାନ ନିଉଜ) : ପିଆରଏମ୍ ହସ୍ପିଟାଲ କ୍ୟାମ୍ପସ୍ ଭିତରୁ ଜବତ ହେଲା ଧଳାଜହର ବ୍ରାଉନସୁଗାର । ପୋଷ୍ଟମର୍ଟମ ରୁମ୍ ପାଖ ଜାଗା ସାଜିଛି ଚୋରା ଚାଲାଣକାରୀଙ୍କ ପାଇଁ ସେଫଜୋନ୍ । ଆଜି ପିଆରଏମ୍ ପୋଷ୍ଟମର୍ଟମ ଗୃହ ପାଖରୁ ୩.୭୨୦ ଗ୍ରାମ୍ ବ୍ରାଉନସୁଗାର ସହିତ ଜଣେ ଯୁବକକୁ ଗିରଫ କରିଛି ପୋଲିସ । ମୟୂରଭଞ୍ଜ ପୋଲିସ ଅଧୀକ୍ଷକ ସ୍ମିତ ପି ପରମାରଙ୍କ ନିର୍ଦ୍ଦେଶ କ୍ରମେ ସ୍ପେଶାଲ୍ ସ୍କ୍ୱାର୍ଡର ଏକ ଟିମ୍ ଏବଂ ବାରିପଦା ଟାଉନ ଥାନା ପୋଲିସ ପିଆରଏମ ପରିସରରୁ ଉକ୍ତ ଯୁବକକୁ ଗିରଫ କରିଥିବା ଟାଉନ ଥାନା ଆଇଆଇସି ବିରେନ୍ଦ୍ର ସେନାପତି ସୂଚନା ଦେଇଛନ୍ତି । ଗିରଫ ଯୁବକ ସୈମ୍ୟରଂଜନ ମିଶ୍ର (୨୯) ।ସେ କଟକ ମାଲଗୋଦାମ ଥାନା ଅନ୍ତର୍ଗତ କଲେଜ ସ୍କୋୟାର୍ ସମାଧିପପଟଣା ଅଞ୍ଚଳର ବୋଲି ଜଣାପଡିଛି । ଟାଉନ ଥାନା ଏସଆଇ ଇନ୍ଦ୍ରଦେବ ଓରାମଙ୍କ ସୂଚନା ଆଧାରରେ ୨୧(ଏ) ଏନଡିପିଏସ ଆକ୍ଟରେ ଏକ ମାମଲା ରୁଜୁ ହେବା ସହିତ ଅଧିକ ତଦନ୍ତ ଜାରି ରହିଛି ।
