ଯାଜପୁର/୯/୦୪ (ସନ୍ଧାନ ନ୍ୟୁଜ): ସରକାରୀ କାର୍ଯ୍ୟାଳୟ ଅଛି, କିନ୍ତୁ ସେଠାକୁ ଯିବା ପାଇଁ ସର୍ବସାଧାରଣ ରାସ୍ତାଟିଏ ନାହିଁ। ଏଭଳି ଏକ ଅଭାବନୀୟ ଚିତ୍ର ଦେଖିବାକୁ ମିଳିଛି ଯାଜପୁର ଜିଲ୍ଲାର ଡୋଲୀପୁର ଅବକାରୀ ଥାନା କ୍ଷେତ୍ରରେ। ବର୍ଷ ବର୍ଷ ଧରି ଏହି ସମସ୍ୟା ଲାଗି ରହିଥିଲେ ମଧ୍ୟ ପ୍ରଶାସନିକ ସ୍ତରରେ କୌଣସି ପଦକ୍ଷେପ ନିଆଯାଉ ନଥିବାରୁ ଏବେ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।ସୂଚନା ଅନୁଯାୟୀ, ଯାଜପୁର ଜିଲ୍ଲା ଡୋଲୀପୁରଠାରେ ଥିବା ଅବକାରୀ ଥାନାକୁ ସଂଯୋଗ କରୁଥିବା କୌଣସି ସ୍ଥାୟୀ ରାସ୍ତା ନାହିଁ। ଥାନାକୁ ଯିବା ପାଇଁ ଲୋକଙ୍କୁ ବିଲ ହୁଡ଼ା କିମ୍ବା ଅନ୍ୟର ବ୍ୟକ୍ତିଗତ ଜମି ଦେଇ ଯିବାକୁ ପଡ଼ୁଛି। ବର୍ଷା ଦିନେ ଏହି ସମସ୍ୟା ଆହୁରି ଜଟିଳ ହୋଇପଡ଼େ। କାଦୁଅ ସରସର ରାସ୍ତାରେ ଯିବା ଆସିବା କରିବା କେବଳ ସାଧାରଣ ଜନତା ନୁହେଁ, ବରଂ କାର୍ଯ୍ୟରତ ଅଧିକାରୀମାନଙ୍କ ପାଇଁ ମଧ୍ୟ କଷ୍ଟକର ହୋଇପଡ଼ିଛି।ଅବକାରୀ ବିଭାଗ ସାଧାରଣତଃ ଚଢ଼ାଉ ଏବଂ ଜବତ ପ୍ରକ୍ରିୟା ପାଇଁ ଗାଡ଼ି ମଟର ବ୍ୟବହାର କରିଥାଏ। ମାତ୍ର ରାସ୍ତା ନଥିବାରୁ ଅପରାଧୀଙ୍କୁ ଧରି ଥାନାକୁ ଆଣିବା କିମ୍ବା ଜବତ ସାମଗ୍ରୀ ପରିବହନ କରିବା ସମୟରେ ଅନେକ ବାଧାବିଘ୍ନ ଉପୁଜୁଛି। ଜରୁରୀକାଳୀନ ସମୟରେ ଗାଡ଼ି ଥାନା ପରିସରକୁ ଯାଇ ନପାରି ଦୂରରେ ରହିବା ଫଳରେ କାର୍ଯ୍ୟରେ ଅହେତୁକ ବିଳମ୍ବ ଘଟୁଛି।ସ୍ଥାନୀୟ ବାସିନ୍ଦାଙ୍କ କହିବା ଅନୁଯାୟୀ, ଅବକାରୀ ଥାନା ଭଳି ଏକ ଗୁରୁତ୍ୱପୂର୍ଣ୍ଣ ସରକାରୀ କାର୍ଯ୍ୟାଳୟକୁ ଯିବା ପାଇଁ ରାସ୍ତା ନରହିବା ପ୍ରଶାସନିକ ଅବହେଳାର ପରିଚୟ। “ଆମେ ବାରମ୍ବାର ଅଭିଯୋଗ କରିବା ସତ୍ତ୍ୱେ କେହି ଶୁଣୁନାହାଁନ୍ତି। ରାସ୍ତା ନଥିବାରୁ ଥାନାକୁ ଯିବା ଆମ ପାଇଁ କାଠିକର ପାଠ ହେଉଛି,” ବୋଲି ଜଣେ ସ୍ଥାନୀୟ ବାସିନ୍ଦା କ୍ଷୋଭର ସହ କହିଛନ୍ତି।
ଏହି ସମସ୍ୟାର ସମାଧାନ ପାଇଁ ତୁରନ୍ତ ଏକ ପକ୍କା ରାସ୍ତା ନିର୍ମାଣ କରିବାକୁ ଦାବି ଜୋର ଧରିଛି। ଜିଲ୍ଲାପାଳ ଏବଂ ଅବକାରୀ ବିଭାଗର ଉଚ୍ଚପଦସ୍ଥ ଅଧିକାରୀମାନେ ଏଥିପ୍ରତି ଦୃଷ୍ଟି ଦେଇ ତୁରନ୍ତ ରାସ୍ତା ସମସ୍ୟାର ସମାଧାନ କରିବେ ବୋଲି ସାଧାରଣରେ ଆଶା କରାଯାଉଛି।
