ବଜ୍ରାଘାତରେ ମହିଳା ମୃତ

କେନ୍ଦୁଝର, ୩/୬ (ସନ୍ଧାନ ନିୟୁଜ), କେନ୍ଦୁଝର ଜିଲ୍ଲା ଘଷିପୁରା ଥାନା ଅନ୍ତର୍ଗତ ନାହାଗଣା ଗ୍ରାମରେ ଆଜି ସନ୍ଧ୍ୟାରେ କାଳବୈଶାଖିର ତାଣ୍ଡବ, ବଜ୍ରାଘାତରେ ଜଣେ ମହିଳା ମୃତ୍ । ଖବର ଅନୁଯାୟୀ ଆଜି ସନ୍ଧ୍ୟାରେ ଅଚାନକ୍ ଘଷିପୁରା ଅଞ୍ଚଳର ବିଭିନ୍ନ ସ୍ଥାନରେ ପ୍ରବଳ ବେଗରେ ପବନ ସହ ବର୍ଷା ଓ ବଜ୍ରପାତ ହୋଇଛି । ଫଳରେ ବଜ୍ରାଘାତରେ ନାହାଗଣା ଗ୍ରାମର ସରସ୍ୱତୀ ପାତ୍ର(୩୨)ଙ୍କର ମୃତ୍ୟୁ ଘଟିଥିବାର ଜଣାପଡିଛି । ମହିଳା ଜଣକ ସନ୍ଧ୍ୟା ସମୟରେ ନିଜ ଘରେ ରୋଷେଇ କାର୍ଯ୍ୟରେ ବ୍ୟସ୍ତ ଥିବା ବେଳେ ହଠାତ୍ ବଜ୍ରପାତ ହୋଇଥିଲା, ଫଳରେ ଆଘାତରେ ଅଚେତ ହୋଇପଡିଥିଲେ । ତାଙ୍କୁ ପରିବାର ଲୋକମାନେ ସଙ୍ଗେ ସଙ୍ଗେ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ସେଠାରେ ଚିକିତ୍ସା ଆରମ୍ଭ ପୂର୍ବରୁ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ ।