ଝାରସୁଗୁଡା,୨୯/୦୪ (ସନ୍ଧାନ ନିୟୁଜ) ରାଜ୍ୟରେ ହୁ ହୁ ହୋଇ ବଢ଼ିଚାଲିଛି କରୋନା। ଚିନ୍ତା ବଢ଼େଇଛନ୍ତି ପଶ୍ଚିମବଙ୍ଗ ଫେରନ୍ତା। ଆଜି ସକାଳେ ଖୋର୍ଦ୍ଧା ଜିଲ୍ଳାରେ ଜଣେ ଆକ୍ରାନ୍ତ ହୋଇଥିବା ବେଳେ ମଧ୍ୟାହ୍ନରେ ଚିହ୍ନଟ ଓଡିଶା ୩ଟି ନୂଆ ଜିଲ୍ଲାରେ କରୋନା ଆକ୍ରାନ୍ତ ଙ୍କ ଖବର ମିଳିଛି। ପ୍ରଥମ କରି ଦେବଗଡ଼, ଝାରସୁଗୁଡ଼ା ଓ କେନ୍ଦୁଝରରେ ଚିହ୍ନଟ୍ ହୋଇଥିବା ବିଷୟରେ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ଏହି ସୂଚନା ମିଳିଛି । ଏହାକୁ ମିଶାଇ ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୧୨୨କୁ ବୃଦ୍ଧି ହୋଇଛି।ସୂଚନା ମୁତାବିକ, ବୁଧବାର ମଧ୍ୟାହ୍ନରେ ଚିହ୍ନଟ ହୋଇଥିବା କରୋନା ଆକ୍ରାନ୍ତ ଯଥାକ୍ରମେ ପ୍ରଥମ ଆକ୍ରାନ୍ତ କେନ୍ଦୁଝର ଜିଲ୍ଲାର ପଞ୍ଚପଲ୍ଲୀ ଅଞ୍ଚଳର ୬୦ବର୍ଷୀୟ ପୁରୁଷ, ଦ୍ୱିତୀୟ ଆକ୍ରାନ୍ତ ଦେବଗଡ ଜିଲ୍ଲା ବାସୁଦେବପୁରର ୩୪ବର୍ଷୀୟ ପୁରୁଷ ଏବଂ ତୃତୀୟ ଆକ୍ରାନ୍ତ ଜଣଙ୍କ ଝାରସୁଗୁଡା ଜିଲ୍ଲାର ବ୍ରଜରାଜନଗର ଅଞ୍ଚଳର ୧୮ବର୍ଷୀୟ ଯୁବତୀ ବୋଲି ରାଜ୍ୟର ସୂଚନା ଓ ଲୋକସଂପର୍କ ବିଭାଗ ଟ୍ୱିଟ୍‌ କରି ସୂଚନା ଦେଇଛନ୍ତି । ଝାରସୁଗୁଡା ପ୍ରଶାସନ ପକ୍ଷରୁ ସତର୍କତା ମୂଳକ ପଦକ୍ଷେପ ଗ୍ରହଣ କରାଯାଇଛି।ଜିଲ୍ଲାପାଳ ସରୋଜ ସାମଲଙ୍କ ନିର୍ଦ୍ଦେଶ କ୍ରମେ ଆଜି ଝାରସୁଗୁଡ଼ା ଓ ସୁନ୍ଦରଗଡ଼ ଜିଲ୍ଲା ସୀମାନ୍ତ ଲଖନପୁର ବ୍ଲକର କୋଇଲିଘୁଗର ଫରେଷ୍ଟ ରୋଡ଼  ଓ ବେତଝରଣ ହିମଗିରି ଫରେଷ୍ଟ ରୋଡ଼ ପ୍ରଭୃତି ରାସ୍ତାକୁ ସିଲ୍‌ କରି ଦିଆଯାଇ ଫରେଷ୍ଟ ଗାର୍ଡ ମୁତୟନ କରାଯାଇ ବାହାର ଜିଲ୍ଲାରୁ ଝାରସୁଗୁଡ଼ା ଜିଲ୍ଲାକୁ ପ୍ରବେଶ ଉପରେ କଡ଼ାକଡ଼ି କଟକଣା କରାଯାଇଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।