ପୂର୍ବତନ ଆଟର୍ଣ୍ଣି ଜେନେରାଲ ପଦ୍ମ ବିଭୂଷଣ ସୋଲି ସୋରାବଜୀଙ୍କର କରୋନାରେ ନିଧନ

ନୂଆ ଦିଲ୍ଲୀ, ୩୦/୪/୨୦୨୧ (ସନ୍ଧାନ ନିଉଜ) : ପୂର୍ବତନ ଆଟର୍ଣ୍ଣି ଜେନେରାଲ, ପଦ୍ମଭୂଷଣ ସମ୍ମାନୀତ ସୋଲି ଜେ ସୋରାବଜୀଙ୍କର ୯୧ ବର୍ଷ ବୟସରେ ଶୁକ୍ରବାରଦିନ ସକାଳେ ନୂଆଦିଲ୍ଲୀର ଏକ ଘରୋଇ ଡାକ୍ତରଖାନାରେ ପରଲୋକ ହୋଇଯାଇଛି। ଭେଟେରାନ ଓକିଲ ତଥା ପୂର୍ବତନ ଆଟର୍ଣ୍ଣି ଜେନେରାଲ କରୋନା ସଂକ୍ରମିତ ହୋଇଥିଲେ। ତାଙ୍କର ଅତୁଳନୀୟ ଆଇନଗତ କାର୍ଯ୍ୟ ଏବଂ ମାନବାଧିକାର ସହ ଜଡିତ ସୋରାବଜୀ ୧୯୫୩ ମସିହାରେ ବମ୍ବେ ହାଇକୋର୍ଟରେ ତାଙ୍କର ଆଇନଗତ ଅଭ୍ୟାସ ଆରମ୍ଭ କରିଥିଲେ। ୧୯୭୧ ମସିହାରେ ସେ ସୁପ୍ରିମକୋର୍ଟଙ୍କ ଦ୍ୱାରା ଜଣେ ବରିଷ୍ଠ ପରାମର୍ଶଦାତା ଭାବରେ ନିଯୁକ୍ତ ହୋଇଥିଲେ। ସେ ୧୯୭୭ ରୁ ୧୯୮୦ ପର୍ଯ୍ୟନ୍ତ ଭାରତର ସଲିସିଟର ଜେନେରାଲଙ୍କ କାର୍ଯ୍ୟାଳୟର କାର୍ଯ୍ୟବାର ସମ୍ଭାଳିଥିଲେ। ସୋରାବଜୀ ପ୍ରଥମେ ୧୯୮୯-୯୦ ରୁ ଏବଂ ପରେ ୧୯୯୮-୨୦୦୪ ରୁ ଭାରତର ଆଟର୍ଣ୍ଣି ଜେନେରାଲ ହୋଇଥିଲେ। ମାର୍ଚ୍ଚ ୨୦୦୨ ରେ ସେ ଭାଷାର ସ୍ୱାଧୀନତା ତଥା ମାନବିକ ଅଧିକାରର ସୁରକ୍ଷା ପାଇଁ ଭାରତର ଦ୍ୱିତୀୟ ସର୍ବୋଚ୍ଚ ନାଗରିକ ପୁରସ୍କାର ପଦ୍ମବିଭୂଷଣ ପୁରସ୍କାରରେ ସମ୍ମାନିତ ହୋଇଥିଲେ।