ରାଜ୍ୟ ସରକାରଙ୍କ ୫-ଟି ଅଭିଯାନରେ ଓଡ଼ିଶା ପୋଲିସ୍‌ର ଏହି ତିନିଟି ଗୁରୁତ୍ବପୂର୍ଣ୍ଣ ସେବା ଯୋଡ଼ି ହୋଇଛି। ମଙ୍ଗଳବାର ଲୋକସେବା ଭବନରେ ଆୟୋଜିତ ଏକ କାର୍ଯ୍ୟକ୍ରମରେ ତିନିଟି ସେବାକୁ ମୁଖ୍ୟମନ୍ତ୍ରୀ ଲୋକାର୍ପଣ କରିଥିଲେ। ଏହି ଅବସରରେ ମୁଖ୍ୟମନ୍ତ୍ରୀ କହିଲେ ମୋ ସରକାର ୫-ଟି ଅଧୀନରେ ରାଜ୍ୟବାସୀଙ୍କୁ ନାଗରିକ କେନ୍ଦ୍ରିକ ଶାସନ ଦେବା ପାଇଁ ପ୍ରତିଶ୍ରୁତିବଦ୍ଧ। ଆଜିର ତିନିଟି ସେବା ଦ୍ଵାରା ଏଣିକି ଲୋକଙ୍କୁ ଅଯଥାରେ ଥାନାକୁ ଦୌଡ଼ିବାକୁ ପଡ଼ିବ ନାହିଁ। ‘ଭର୍ଚୁଆଲ୍‌ ପୋଲିସ୍‌ ଷ୍ଟେସନ୍’ ବ୍ୟବସ୍ଥା ଅନୁଯାୟୀ ଏହା ଏକ ଅନ୍‌ଲାଇନ୍ ବ୍ୟବସ୍ଥା‌। ଭୁବ‌େନଶ୍ଵରରେ କ୍ରାଇମ୍‌ ରେକର୍ଡ ବ୍ୟୁରୋରେ ଏହା କାର୍ଯ୍ୟ କରିବ। ଗାଡ଼ି ଚୋରି ହୋଇଗଲେ ଗାଡ଼ି ମାଲିକଙ୍କୁ ଆଉ ଥାନାକୁ ଯାଇ ଏତଲା ଦେବାକୁ ପଡ଼ିବନି। ନିଜ ମୋବାଇଲ୍‌ ଯୋଗେ ଅନ୍‌ଲାଇନ୍‌ରେ ପୋଲିସ୍‌କୁ ଅଭିଯୋଗ ପଠାଇ ପାରିବେ। ପୋଲିସ୍‌ ଅନ୍‌ଲାଇନ୍‌ରେ ହିଁ ଏତଲାକୁ ପଞ୍ଜୀକରଣ କରି ତଦନ୍ତ କରିବ। ଚୋରି ଗାଡ଼ିର ସନ୍ଧାନ ନ ମିଳିଲେ ୨୧ ଦିନ ପରେ ଚୂଡ଼ାନ୍ତ ଫର୍ମ ସିସିଟିଏନ୍‌ଏସ୍‌ରେ ଜେନେରେଟ୍‌ ହେବ। ମୋଟର୍‌ ସାଇକେଲ୍‌ ଚୋରି କ୍ଷେତ୍ରରେ ବୀମା ଦାବି ପାଇଁ ଏହା ସହାୟକ ହେବ। ଜଣେ ବ୍ୟକ୍ତି ଚାହିଁଲେ ସିଟିଜେନ୍‌ସ୍‌ ପୋର୍ଟାଲ୍‌ କିମ୍ବା ସହାୟତା ମୋବାଇଲ୍‌ ଆପ୍ ଜରିଆରେ ମଧ୍ୟ ଏତଲା ଦେଇପାରିବେ।