ଓଡ଼ିଶା ଭଳି ଦିଲ୍ଲୀରେ ଲାଗୁ ହେବ ଆୟୁଷ୍ମାନ ଭାରତ

ନୂଆଦିଲ୍ଲୀ/ସନ୍ଧାନ ନ୍ୟୁଜ: ଦିଲ୍ଲୀରେ ବଦଳିଲା ସରକାର । ଓଡ଼ିଶା ପରି ସେଠାରେ ବିଜେପି କ୍ଷମତାକୁ ଆସିବା ପରେ ଲାଗୁ ହୋଇ ନଥିବା କେନ୍ଦ୍ରୀୟ ଯୋଜନା ଏବେ ଲାଗୁ ହେବକୁ ଯାଉଛି । ବିଜେପି ଓଡ଼ିଶା ଫର୍ମୁଲାରେ ଦିଲ୍ଲୀ ଶାସନ ଆରମ୍ଭ କରିବାର ସଙ୍କେତ ଦେଇଛି । ଓଡ଼ିଶାରେ ବିଜେପି କ୍ଷମତାକୁ ଆସିବା ପରେ ଗୋପବନ୍ଧୁ ଜନ ଆରୋଗ୍ୟ କାର୍ଡ ସହ ଆୟୁଷ୍ମାନ ଯୋଜନା ଲାଗୁ କଲା, ଦିଲ୍ଲୀରେ ମଧ୍ୟ ସେହିଭଳି ଭାବେ ମହଲା କ୍ଲିନିକକୁ ହଟାଇ ଏହାକୁ ଆୟୁଷ୍ମାନ ଆରୋଗ୍ୟ ମନ୍ଦିରକୁ ପରିବର୍ତ୍ତନ କରିପାରେ ବୋଲି ସୂଚନା ମିଳିଛି । ଏଥିସହ ଦିଲ୍ଲୀରେ ଖୁବଶୀଘ୍ର ଆୟୁଷ୍ମାନ ଭାରତ ଯୋଜନା ଲାଗୁ ହେଇପାରେ ବୋଲି ସୂଚନା ମିଳିଛି । ପିଟିଆଇର ସୂଚନା ମୁତାବକ, ରାଜଧାନୀ ଦିଲ୍ଲୀରେ ୫୧ ଲକ୍ଷ ଲୋକଙ୍କୁ ଆୟୁଷ୍ମାନ ଭାରତରେ ଯୋଡା ଯାଇପାରେ । ତେବେ ଯଦି ମହଲା କ୍ଲିନିକ୍‌ଗୁଡ଼ିକୁ ଆୟୁଷ୍ମାନ ଆରୋଗ୍ୟ ମନ୍ଦିରରେ ପରିଣତ କରାଯାଏ, ତେବେ ସେମାନଙ୍କୁ ଆୟୁଷ୍ମାନ ଭାରତ ଯୋଜନା ଅଧୀନରେ ଜାରି ହୋଇଥିବା ନିର୍ଦ୍ଦେଶାବଳୀ ପାଳନ କରିବାକୁ ପଡିବ ।ଦିଲ୍ଲୀରେ ଆୟୁଷ୍ମାନ ଭାରତ କାର୍ଡ ୫୧ ଲକ୍ଷ ଲୋକଙ୍କୁ ପ୍ରଦାନ କରାଯିବାର ସମ୍ଭାବନା ରହିଛି । ଦିଲ୍ଲୀରେ ମହଲା କ୍ଲିନିକ୍‌ରେ ଦୁର୍ନୀତି ଅଭିଯୋଗ ନେଇ ସରକାର ବହୁତ ଚିନ୍ତିତ । ଦିଲ୍ଲୀର ନୂତନ ସ୍ୱାସ୍ଥ୍ୟମନ୍ତ୍ରୀଙ୍କୁ ମହଲା କ୍ଲିନିକ୍‌ ଗୁଡ଼ିକର ସ୍ଥିତି ଓ ଏଗୁଡ଼ିକୁ ଆୟୁଷ୍ମାନ ଆରୋଗ୍ୟ ମନ୍ଦିରରେ ପରିଣତ କରାଯାଇପାରିବ କି ନାହିଁ ସେ ବିଷୟରେ ଏକ ରିପୋର୍ଟ ଦାଖଲ କରିବାକୁ କୁହାଯିବ ।ସୂଚନାଯୋଗ୍ୟ, ଆପ ନେତୃତ୍ୱାଧୀନ ଦିଲ୍ଲୀ ସରକାର ଏବଂ ପଶ୍ଚିମବଙ୍ଗ ଏପର୍ଯ୍ୟନ୍ତ ନିଜ ନିଜ ରାଜ୍ୟରେ ଆୟୁଷ୍ମାନ ଭାରତ ଯୋଜନା କାର୍ଯ୍ୟକାରୀ କରିନାହାଁନ୍ତି । ହେଲେ ଏବେ ଦିଲ୍ଲୀରେ ବିଜେପି ସରକାର ଆସିବା ପରେ, ସେଠାରେ ଏବେ ଆୟୁଷ୍ମାନ ଭାରତ ଯୋଜନା ଲାଗୁ ସହିତ ମହଲା କ୍ଲିନିକକୁ ଆରୋଗ୍ୟ ମନ୍ଦିରରେ ବଦଳାଯିବ ବୋଲି ସୂଚନା ମିଳୁଛି ।