ଭୁବନେଶ୍ବର, ୧୯/୦୭ (ସନ୍ଧାନ ନିଉଜ): ରାଜ୍ୟରେ ବେଆଇନ ଡ୍ରଗ୍ସ କାରବାରର ପର୍ଦ୍ଦାଫାସ ପାଇଁ ପୁଣି ଥରେ ଆକ୍ସନ ମୁଡରେ କ୍ରାଇମବ୍ରାଞ୍ଚର ଏସଟିଏଫ । ଏହି ପରିପ୍ରେକ୍ଷୀରେ ମୟୂରଭଞ୍ଜ ଜିଲ୍ଲା କୁଳିଅଣା 16 ନମ୍ବର ଜାତୀୟ ରାଜପଥରେ ଚଢାଉ କରି ଜଣେ ଧଳାଜହର ବେପାରୀକୁ ଗିରଫ କରିଛି ଟିମ୍ । ଗିରଫ ଡିଲର ହେଲା ଶେକ୍ ଆସିକ୍ । ତା’ ଘର ବାରିପଦା ଅସ୍ଥିଆର ଚିପଟ ଗ୍ରାମରେ । ଏସଟିଏଫ୍ ଶେକ ନିକଟରୁ ୩ କେଜି ୨୮୫ ଗ୍ରାମ ବ୍ରାଉନସୁଗାର ଜବତ କରିଛି । ଯାହାର ଆନୁମାନିକ ମୂଲ୍ୟ ସାଢେ ୩ କୋଟି ଟଙ୍କା ହେବ ।ଶେକର ଏହି କାରବାରର ପର୍ଦ୍ଦାଫାସ କରିବାକୁ ତାର ମୋବାଇଲ ଫୋନକୁ ଲଗାତାର ମାସେ ହେବ ଟ୍ରାକ କରୁଥିଲା ଟିମ୍ । ରବିବାର ପାହାନ୍ତିଆ ସମୟରେ ଶେକ ଆସିକ ଏବଂ ତାର ସହଯୋଗୀ ପଲସର ବାଇକରେ ବ୍ରାଉନ ସୁଗାର ନେଇ ମୟୂରଭଞ୍ଜ ଯାଉଥିବା ବେଳେ କାବୁ କରିଥିଲା ।ତେବେ ଘଟଣାରେ ଶେଖ ଧରାପଡ଼ିଥିବା ବେଳେ ତାର ସହଯୋଗୀ ଫେରାର ହୋଇଯାଇଛି । ବର୍ତ୍ତମାନ ତାକୁ ରିମାଣ୍ଡରେ ଆଣି ପଚରାଉଚରା କରାଯିବ ।