ଯୌତୁକଜନିତ ବଧୂନିର୍ଯାତନା ଅଭିଯୋଗ, ଅଭିଯୁକ୍ତ ସ୍ୱାମୀ, ଶଶୁର ଓ ଶାଶୁ ଗଲେ ଜେଲ ହାଜତ

ବାରିପଦା, 14/10 (ସନ୍ଧାନ ନ୍ୟୁଜ୍) :-  ଯୌତୁକଜନିତ ବଧୂଙ୍କୁ ନାନାଭାବେ ନିର୍ଯ୍ୟାତନା ସହ ଜୀବନରୁ ମାରି ଦେବା ଉଦ୍ୟମ ଆଦି ବିଭିନ୍ନ ଅଭିଯୋଗ ନେଇ ପତ୍ନୀଙ୍କ ଦ୍ବାରା ବାରିପଦା ଟାଉନ ଥାନାରେ ରୁଜୁ ହୋଇଥିବା ମାମଲାରେ ଗିରଫ ତିନି ଅଭିଯୁକ୍ତ ସ୍ୱାମୀ ଦେବାଶିଷ ସାହୁ(୩୨), ଶ୍ବଶୁର ଗୌରାଙ୍ଗଚରଣ ସାହୁ(୫୯) ଓ ଶାଶୁ ମମତାରାଣୀ ସାହୁ(୫୦)ଙ୍କୁ ଆଜି ବାରିପଦା କୋର୍ଟ ଚାଲାଣ କରାଯିବା ପରେ ବାରିପଦା ଜେଲ ହାଜତକୁ ପଠାଇ ଦିଆଯାଇଥିବା ଜଣାଯାଇଛି । ଟାଉନ ଥାନା ଇଲାକା ଲକ୍ଷ୍ମୀପୋଷିର ସୁବର୍ଣ୍ଣରେଖା ଜଳସେଚନ ପ୍ରକଳ୍ପ କଲୋନୀ ନିବାସୀ ଦେବାଶିଷ ସାହୁଙ୍କ ପତ୍ନୀ ସୁଚରିତା ସାହୁଙ୍କ ଅଭିଯୋଗକ୍ରମେ ଥାନାରେ ସୋମବାର ସନ୍ଧ୍ୟାରେ ୬୯୯/୨୦ ନମ୍ବରର ଏକ ମାମଲା ଭାରତୀୟ ଦଣ୍ଡବିଧାନ ଆଇନର ୪୯୮(କ), ୩୨୩, ୩୪୨, ୨୯୪, ୫୦୬, ୩୫୪, ୩୦୭, ୩୧୩ ଓ ୩୪ ଦଫା ସହିତ ଯୌତୁକ ନିବାରଣ ଆଇନର ୪ ଧାରାରେ ରୁଜୁ ହୋଇଥିବା ସହ ମହିଳା ପୁଲିସ ସବ୍‌ଇନ୍ସପେକ୍ଟର ରିତା ବେହେରାଙ୍କ ଦ୍ୱାରା ତଦନ୍ତ ଚାଲିଛି । ଅଭିଯୋଗ ଅନୁଯାୟୀ ଅଭିଯୋଗକାରିଣୀଙ୍କ ସହିତ ଗତ ତିନି ବର୍ଷ ତଳେ ଅଭିଯୁକ୍ତ ସ୍ବାମୀଙ୍କ ସହିତ ସେମାନଙ୍କ ପ୍ରଥା ଅନୁଯାୟୀ ବିବାହ ହୋଇଥିଲା । କିନ୍ତୁ କିଛି ଦିନ ପରେ ଘରୋଇ କଳିକୁ ନେଇ ଅଭିଯୁକ୍ତମାନେ ତାଙ୍କୁ ନିର୍ଯ୍ୟାତନା ଦେବା ସହିତ ପିଟାମାରା କରିବା ଘଟଣା ଅସହ୍ୟ ହେବାରୁ ସେ ତାଙ୍କ ବାଲେଶ୍ବରସ୍ଥ ପିତାଙ୍କ ଘରେ ଆଶ୍ରୟ ନେଇ ଏହି ଅଭିଯୋଗ କରିଥିବା ପ୍ରକାଶ।