ନୂଆଦିଲ୍ଲୀ, ୨୨/୦୪ (ସନ୍ଧାନ ନିଉଜ): ଭାରତରେ କରୋନା ସଂକ୍ରମଣ ବଢାଇବା ପାଇଁ ପାକିସ୍ଥାନ ଯୋଜନା କରିଛି। ସେଥିପାଇଁ କରୋନା ପଜିଟିଭ ରୋଗୀଙ୍କୁ କଶ୍ମୀରରେ ପଠାଇବା ଆରମ୍ଭ କରିପାରେ ବୋଲି ଶୁଣିବାକୁ ପାଇଛୁ। ଏହା କହିଛନ୍ତି ଜମ୍ମୁ-କଶ୍ମୀରର ପୋଲିସ ମହାନିର୍ଦ୍ଦେଶକ ଦିଲବାଗ ସିଂ।
ବୁଧବାର ଶ୍ରୀ ସିଂ ପୋଲିସ ଟ୍ରେନିଂ ସ୍କୁଲ ଭିତରେ ଓ ଉତ୍ତର କଶ୍ମୀରର ଗାନଦେରବାଲ ଜିଲ୍ଲାର କ୍ୱାରେଣ୍ଟାଇନ୍ କେନ୍ଦ୍ର ପରିଦର୍ଶନ କରିଥିଲେ। ଏହି ଅବସରରେ ଗଣମାଧ୍ୟମକୁ ସେ କହିଛନ୍ତି ଲୋକେ ସଂକ୍ରମିତ ଆତଙ୍କବାଦୀଙ୍କ ପ୍ରତି ସତର୍କ ରହିବା ଆବଶ୍ୟକ। କାରଣ କରୋନା ସଂକ୍ରମିତ ଆତଙ୍କବାଦୀମାନେ ଏହି ଭୂତାଣୁକୁ ବିସ୍ତାର କରିବା ଉଦ୍ଦେଶ୍ୟରେ ଜମ୍ମୁ-କଶ୍ମୀରକୁ ପ୍ରବେଶ କରିବାର ଆଶଙ୍କା ରହିଛି। ପାକିସ୍ତାନର ଆତଙ୍କବାଦୀ ଶିବିରରେ କରୋନା ବ୍ୟାପିଥିବା ଦୃଢ ପ୍ରମାଣ ମିଳିଛି। ତେଣୁ କରୋନା ଦ୍ୱାରା ପୀଡିତ ଆତଙ୍କବାଦୀଙ୍କୁ ପାକିସ୍ତାନ ଭାରତକୁ ପଠାଇ ଲୋକଙ୍କୁ ସଂକ୍ରମିତ କରିବାକୁ ଚେଷ୍ଟା କରିବ।
