ଚୀନ ଦ୍ୱାରା ପ୍ରଥମ ହାଇପରସୋନିକ୍‍ ଯୁଦ୍ଧ ବିମାନର ସଫଳ ପରୀକ୍ଷଣ

ବେଜିଂ, ୭/୮(ସନ୍ଧାନ ନିୟୁଜ)ଚୀନ ନିଜର ପ୍ରଥମ ହାଇପରସୋନିକ୍‍ ଯୁଦ୍ଧ ବିମାନର ସଫଳ ପରୀକ୍ଷଣ କରିଛି ବୋଲି ସୋମବାର ଘୋଷଣା କରିଛି। ଏହି ହାଇପରସୋନିକ୍‍ ବିମାନରେ ପରମାଣୁ ଅସ୍ତ୍ର ବହନର କ୍ଷମତା ରହିଛି ଓ ଏହି ଯୁଦ୍ଧ ବିମାନ ବର୍ତ୍ତମାନ ପିଢିର ସମସ୍ତ କ୍ଷେପଣାସ୍ତ୍ର ପ୍ରତିରୋଧକ ବ୍ୟବସ୍ଥା (ଆଣ୍ଟି-ମିସାଇଲ ସିଷ୍ଟମ) ଭେଦ କରିପାରିବ ବୋଲି ଚୀନ ଦାବି କରିଛି। ଚୀନ ଆକାଡେମୀ ଅଫ ଏରୋସ୍ପେସ୍‍ ଏରୋଡାଇନାମିକ୍ସ (ସିଏଏଏ) ଏବଂ ଚୀନ ଏରୋସ୍ପେସ୍‍ ସାଇନ୍ସ ଆଣ୍ଡ ଟେକ୍ନୋଲୋଜି କର୍ପୋରେସନ ମିଳିତ ଭାବେ ଏହି ବିମାନକୁ ପ୍ରସ୍ତୁତ କରିଛନ୍ତି। ସିଏଏଏ ପକ୍ଷରୁ କୁହାଯାଇଛି ଯେ ଗତ ଶୁକ୍ରବାର ହାଇପରସୋନିକ୍‍ ଯୁଦ୍ଧ ବିମାନ ‘ଜିଙ୍ଗକୋଙ୍ଗ-୨’ ଅବା ‘ଷ୍ଟାରି ସ୍କାଏ-୨’ ପରୀକ୍ଷଣ କରାଯାଇଥିଲା। ଏହାକୁ ରକେଟ୍‍ ଯୋଗେ ଆକାଶକୁ ଛଡ଼ାଯାଇଥିଲା। ଏହାପରେ ଏହା ନିଜେ ଉଡ଼ାଣ ଭରି ଯୋଜନା ଅନୁସାରେ ଧାର୍ଯ୍ୟ ଅଞ୍ଚଳରେ ଅବତରଣ କରିଥିଲା। ଆଉ କେତେକ ପରୀକ୍ଷା ପରେ ଏହାକୁ ସେନାରେ ସାମିଲ କରାଯିବ ବୋଲି ସୂଚନା ଦିଆଯାଇଛି। ଏହି ବିମାନ ନିଜ ୱେଭ (ତରଙ୍ଗ)ରେ ଚଳାଚଳ କରୁଥିବାରୁ ଏହାକୁ ‘ୱେଭରାଇଡ଼ର’ କୁହାଯାଉଛି। ପରୀକ୍ଷଣ ସମୟରେ ଏହା ଭୂପୃଷ୍ଠରୁ ୩୦ କିଲୋମିଟର ଉଚ୍ଚତା ପର୍ଯ୍ୟନ୍ତ ଉଡ଼ିଥିଲା। ବିଶେଷଜ୍ଞଙ୍କ କହିବା ଅନୁସାରେ ବର୍ତ୍ତମାନ ପିଢିର ସମସ୍ତ ପ୍ରତିରକ୍ଷା ବ୍ୟବସ୍ଥାକୁ ଏହା ଭେଦ୍‍ କରିପାରିବ। ଏପରିକି କ୍ରୁଜ୍‍ ଏବଂ ବାଲାଷ୍ଟିକ କ୍ଷେପଣାସ୍ତ୍ରକୁ ଏହା ରୋକିବାରେ ସକ୍ଷମ ହେବ। ‘ୱେଭରାଇଡ଼ର’କୁ କୌଣସି ବି ରକେଟ୍‍ ଦ୍ୱାରା ଆକାଶକୁ ପଠାଇ ହେବ ଓ ଏହା ପାରମ୍ପରିକ ଏବଂ ପରମାଣୁ ଯୁଦ୍ଧାସ୍ତ୍ର ବହନ କରିପାରିବ।