ଇଥିଓପିଆ ପ୍ରଧାନମନ୍ତ୍ରୀଙ୍କ ରାଲି ବେଳେ ବିସ୍ଫୋରଣ

ଆଦିସ୍‍ ଆବାବା (ସନ୍ଧାନ ନୁ୍ୟଜ): ଇଥିଓପିଆର ଆଦିସ୍‍ ଆବାବା ଅନ୍ତର୍ଗତ ମେସ୍କଲ ସ୍କୋୟାରଠାରେ ଶନିବାର ପ୍ରଧାନମନ୍ତ୍ରୀ ଆବିୟ ଅହମ୍ମଦଙ୍କ ଏକ ରାଲି ବେଳେ ବିସ୍ଫୋରଣ ଘଟିଛି। ହଜାର ହଜାର ଲୋକଙ୍କ ଗହଣରେ ପ୍ରଧାନମନ୍ତ୍ରୀ ଅହମ୍ମଦ ବକ୍ତବ୍ୟ ଦେବା ବେଳେ ଏହି ବିସ୍ଫୋରଣ ହୋଇଥିଲା। ଫଳରେ ସୁରକ୍ଷା ବାହିନୀ ତୁରନ୍ତ ଅହମ୍ମଦଙ୍କୁ ଘଟଣାସ୍ଥଳରୁ ସୁରକ୍ଷିତ ଭାବେ ବାହାର କରି ନେଇଯାଇଥିଲେ। ଏହା କମ୍‍ ଶକ୍ତିଶାଳୀ ବିସ୍ଫୋରଣ ହୋଇଥିବା ବେଳେ ଏଥିରେ ଅଳ୍ପ କିଛି ଲୋକ ଆହତ ହୋଇଥିବା ସ୍ଥାନୀୟ ପୁଲିସ ପ୍ରକାଶ କରିଛି। ବିସ୍ଫୋରଣ ସମ୍ବନ୍ଧରେ ତଦନ୍ତ ଜାରି ରହିଛି। ଫେବୃଆରୀରେ ହୈଲେମାରିଅମ୍‍ ଡେସାଲେଗନ୍‍ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପରେ ଅହମ୍ମଦ ଏହି ଦାୟିତ୍ୱ ଗ୍ରହଣ କରିଥିଲେ।