ଆତଙ୍କବାଦୀ ଆଡ୍ଡା ଉପରେ ଆକ୍ରମଣ, ଅନ୍ତର୍ଜାତୀୟ ଧାବିକା ଗାଁରେ ଉତ୍ସବ

ରସୁଲପୁର, ୨୭/୨ (ସନ୍ଧାନ ନିଉଜ/ଜଗମୋହନ ରାଉତ) ରସୁଲପୁର ବ୍ଲକ ଅନ୍ତର୍ଗତ ଦୌଡରାଣୀ ସରସ୍ୱତୀ ଓ ଦୂତୀ ଚାନ୍ଦଙ୍କ ଗାଁ ଚକଗୋପାଳପୁରରେ ଭାରତ ପକ୍ଷରୁ ଆତଙ୍କବାଦୀ ବିରୋଧୀ ପଦକ୍ଷେପକୁ ସ୍ୱାଗତ କରାଯାଇଛି । ଭାରତୀୟ ବାୟୁସେନା ପକ୍ଷରୁ ଆତଙ୍କବାଦୀ ଆଡ୍ଡା ଉପରେ ଘନ ଘନ ଆକ୍ରମଣ ଅତ୍ୟନ୍ତ ପ୍ରଶଂସନୀୟ । ଏ ନେଇ ଗାଁ ଉତ୍ସବ ମୁଖର ହୋଇଉଠିଛି । ଧାବିକା ସରସ୍ୱତୀ ଚାନ୍ଦଙ୍କ ନେତୃତ୍ୱରେ ଗ୍ରାମର ଯୁବକମାନେ ଗାଁ ପରିକ୍ରମା କରି ଜୟ ଯବାନ, ଜୟହିନ୍ଦ୍ ନାରା ଦେଇଥିଲେ । ଆତସବାଜୀ ଫୁଟାଇ ଓ ଦୀପଜାଳି ଗାଁ ଲୋକେ ଖୁସି ମନାଇଥିଲେ । ଜାମୁ କାଶ୍ମୀର ସୀମାରେ ଯବାନମାନଙ୍କୁ ଉତ୍ସାହିତ କରିବା ପାଇଁ ବୀର ଯବାନମାନେ ଧର୍ଯ୍ୟର ସହ ଲଢେଇ ଜାରି ରଖନ୍ତୁ । ସେମାନଙ୍କ ପଛରେ ସମଗ୍ର ଭାରତବର୍ଷ ରହିଛି । ଏଥିସହ ଆତଙ୍କବାଦୀ ରାଷ୍ଟ୍ର ପାକିସ୍ଥାନକୁ ଭାରତର ଦୃଢ ଜବାବ ବୋଲି ସରସ୍ୱତୀ ପ୍ରକାଶ କରିଛନ୍ତି । ୧୯୯୯ ମସିହାରେ କାରଗିଲ ଯୁଦ୍ଧ ପରେ ୨୦୧୯ ମସିହାରେ ପୁଲୱାମା ଆକ୍ରମଣକୁ ନେଇ ଭାରତର ପଲଟା ଜବାବ ସମଗ୍ର ଭାରତବର୍ଷରେ ଖୁସିର ଲହରୀ ଖେଳାଇ ଦେଇଛି । ଏହି ଖୁସିକୁ ସମସ୍ତଙ୍କ ମଧ୍ୟରେ ବାଂଟିବା ପାଇଁ ସେ ଗାଁରେ ଏଭଳି ଏକ ଉତ୍ସବ ଆୟୋଜନ କରାଯାଇଛି ବୋଲି ଗ୍ରାମବାସୀ ପକ୍ଷରୁ କୁହାଯାଇଛି ।