ସାଇକେଲକୁ ଧକ୍କା ଦେଲା ବାଇକ୍, ୧ମୃତ ୨ଗୁରୁତର

କେନ୍ଦୁଝର, ୧୪/୬ (ସନ୍ଧାନ ନିୟୁଜ) କେନ୍ଦୁଝର ସଦର ବ୍ଲକ ଅନ୍ତର୍ଗତ ପଦ୍ମପୁର ଭୁବନାନନନ୍ଦ ପବ୍ଲିସ୍କୁଲ ନିକଟସ୍ଥ ବାଇବାସ ରାସ୍ତାର ସର୍ଭିସ ରୋଡ଼ ନିକଟରେ ବାଇକ୍ ସହ ସାଇକେଲ ଧକ୍କା ଜଣଙ୍କର ମୃତ୍ୟୁ ଘଟିଥିବା ବେଳେ ଦୁଇଜଣ ଗୁରୁତର ହୋଇଛନ୍ତି । ଖବର ଅନୁଯାୟୀ ଗୁରୁବାର ସନ୍ଧ୍ୟା ୭ଘଟିକା ୧୫ ମିନିଟ୍ ସମୟରେ ଏହି ଦୁର୍ଘଟଣା ଘଟିଛି । ବଣୁଆଁ ଗ୍ରାମର ଅଜୟ ମୁଣ୍ତା ତାଙ୍କ ସାଥିରେ ଦୁଇଜଣ (ଓଆର ୦୯ ଜି ୨୬୯୨) ନମ୍ବର ବାଇକ୍ ଯୋଗେ ପଦ୍ମପୁର ପଟୁ ବଣୁଆଁ ଅଭିମୁଖେ ଯାଉଥିଲେ । ସେମାନେ ମଦ୍ୟପାନ କରି ନିଶାଶକ୍ତ ଅବସ୍ଥାରେ ଘରକୁ ଯାଉଥିବା ବେଳେ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହେଇଛନ୍ତି । ପ୍ରଥମେ ପୁଟୁଳିଆ ଗ୍ରାମର ଜୟଦେବ ମିଶ୍ରଙ୍କ ଘର ପାଖରେ ଗୋଟିଏ ବଳଦକୁ ଧକ୍କା ଦେଇଥିଲେ । ଧକ୍କା ଦେବା ଫଳରେ ବଳଦଟିର ଗୋଟିଏ ଗୋଡ଼ ଭାଙ୍ଗିଯାଇଥିବାର ଜଣାପଡିଛି । ପରେ ଜଣେ ସାଇକେଲ ଆରୋହୀଙ୍କୁ ଧକ୍କା ଦେଇଥିଲେ, ଫଳରେ ସାଇକେଲ ଆରୋହୀଙ୍କ ସାମାନ୍ୟ ଖଣ୍ତିଆ ଖାବରା ହୋଇଯାଇଥିଲା । ହେଲେ ବାଇକ୍ ଆରୋହୀଙ୍କ ସହ ସାଙ୍ଗରେ ଥିବା ଅନ୍ୟ ସାଥିମାନେ ରାସ୍ତା ଉପରେ ଛିଟିକି ପଡ଼ିଥିଲେ । ଘଟଣାର ଖବର ପାଇ ସଦର ପୋଲିସ ଘଟଣାସ୍ଥଳରେ ପହଞ୍ଚି ବନାଯୋଡ଼ି ଟୋଲଗେଟର ୧୦୩୩ ଆମ୍ବୁଲାନ୍ସ ଯୋଗେ କେନ୍ଦୁଝର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ । ସେଠାରେ ଚିକିତ୍ସା ଆରମ୍ଭ ପୂର୍ବରୁ ଜଣଙ୍କୁ ଡାକ୍ତର ମୃତ ଘୋଷଣା କରିଛନ୍ତି । ପୋଲିସ ଦୁର୍ଘଟଣାଗ୍ରସ୍ତ ଗାଡିକୁ ଜବତ କରି ନିଜ ଅକ୍ତିଆରକୁ ନେବା ଘଟଣାର ତଦନ୍ତ ଆରମ୍ଭ କରିବା ସହ ମୃତ ଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଥିବାର ଜଣାପଡିଛି ।