ରାସ୍ତା ରେ ଶୋଇଥିବା ଶ୍ରମିକଙ୍କ ଉପରେ ମାଡିଗଲା ଟ୍ରକ ୧୪ ଶ୍ରମିକ ମୃତ

ବାରିପଦା, 19.01.2021(ସନ୍ଧାନ ନିଉଜ୍/  ଲିଙ୍ଗରାଜ ପଣ୍ଡା):-  ମର୍ମନ୍ତୁଦ ସଡ଼କ ଦୁର୍ଘଟଣା  ଆଖିପିଛୁଲାକେ ଲିଭିଗଲା ୧୪ଜଣଙ୍କ ଶ୍ରମିକଙ୍କ ଜୀବନ ଦୀପ । ଦୁର୍ଘଟଣାରେ ୧୪ଜଣଙ୍କ ମୃତ୍ୟୁ ହୋଇଥିବା ବେଳେ ଆଉ କିଛି ଶ୍ରମିକ ଆହତ ହୋଇଛନ୍ତି । ସମସ୍ତ ଆହତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ଆହତଙ୍କ ମଧ୍ୟରୁ କିଛି ଶ୍ରମିକଙ୍କ ଅବସ୍ଥା ଗୁରୁତର ଥିବା ସୂଚନା ମିଳିଛି । ତେବେ  ମୃତକଙ୍କ ମଧ୍ୟରେ ଗୋଟିଏ ଶିଶୁ ଥିବା ମଧ୍ୟ ଜଣାପଡିଛି । ଖବର ଅନୁଯାୟୀ, ଆଖୁ ଭର୍ତ୍ତି ଏକ ଟ୍ରକ ଖୁବ୍‌ ଜୋରରେ ଆସିଥିଲା । ହଠାତ୍‌ ଗାଡିଟି ଭାରସାମ୍ୟ ହରାଇ ରାସ୍ତା କଡ଼ରେ ଛିଡ଼ା ହୋଇଥିବା ଶ୍ରମିକଙ୍କ ପାଇଁ କାଳ ସାଜିଛି । ରାସ୍ତାକଡ଼ରେ ଛିଡା ହୋଇଥିବା ୧୮ଜଣ ଶ୍ରମିକଙ୍କ ଧକ୍କା ଦେଇଥିଲା । ଯାହାଫଳରେ କି ସେମାନଙ୍କ ମଧ୍ୟରେ ୧୪ଜଣ ଶ୍ରମିକଙ୍କ ଘଟଣାସ୍ଥଳରେ ମୃତ୍ୟୁ ହୋଇଯାଇଛି । ସେହିପରି ଅନ୍ୟ କିଛି ଜଣ ଆହତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ସେଠାରେ ସେମାନଙ୍କ ଚିକିତ୍ସା ଜାରି ରହିଛି । ଗୁଜୁରାଟ ସୁରତର ପିପଲୋଦ ଗାଁରେ ଏହି ଦୁର୍ଘଟଣା ଘଟିଛି । ତେବେ ମିଳିଥିବା ସୂଚନାନୁସାରେ ମେଡିକାଲରେ ଚିକିତ୍ସାଧୀନ ରହିଥିବା ଶ୍ରମିକଙ୍କ ଅବସ୍ଥା ଗୁରୁତର  ରହିଛି । ଲଗାତର ଭାବେ ସେମାନଙ୍କ ଉପରେ ଡାକ୍ତରୀ ଟିମ୍ ନଜର ରଖିଛନ୍ତି । ତେବେ ମୃତାହତ ଶ୍ରମିକମାନେ ରାଜସ୍ଥାନର ବାସଓ୍ୱାଡା ଜିଲ୍ଲାର କୁଶଲଗଡ଼ର ବାସିନ୍ଦା । ଘଟଣାସ୍ଥଳରେ ପୋଲିସ ପହଞ୍ଚି ଛାନ୍‌ଭିନ୍‌ ଜାରି ରଖିଛି । ପୋଲିସକୁ କିଛି ମୃତକଙ୍କ ପରିଚୟ ହସ୍ତଗତ ହୋଇଛି ବୋଲି ସୂଚନା ମିଳିଛି ।