ରସିକ ପ୍ରେମିକ ହେଲେ କୋର୍ଟ ଚାଲାଣ

ରାଉରକେଲା/କେନ୍ଦୁଝର, ୭/୧/୨୦ (ସନ୍ଧାନ ନିଉଜ)  : ପ୍ରେମିକ ପାଖକୁ ପ୍ରେମିକା ପଠାଇଥିବା ଫଟୋ ପରବର୍ତ୍ତୀ ତାଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି କରିଥିଲା। ପ୍ରେମରେ ଫାଟ ସୃଷ୍ଟି ହେବାରୁ ସେହି ଫଟୋକୁ ପ୍ରେମିକ ଭାଇରାଲ କରିଦେଇଥିଲେ। ଏନେଇ ଯୁବତୀଙ୍କ ପରିବାର ପକ୍ଷରୁ ଥାନାରେ ଅଭିଯୋଗ କରାଯିବା ପରେ ପୋଲିସ ଅଭିଯୁକ୍ତଙ୍କୁ ବାଙ୍ଗାଲୋରରୁ ଗିରଫ କରିଛି। ଏହି ଅଭିଯୁକ୍ତର ନାମ ସନ୍ଦୀପ ଗିରି। ଘର କେନ୍ଦୁଝର ଜିଲ୍ଲା ଘଟଗାଁ ଥାନା ଗଦାଧରପୁର ଗ୍ରାମରେ। କେନ୍ଦୁଝର ସହରର ସମ୍ପୃକ୍ତ ଯୁବତୀଙ୍କ ଦୂର ସମ୍ପର୍କୀୟ ହେଉଛନ୍ତି ସନ୍ଦୀପ। ସେ ବେଙ୍ଗାଲୁରୁର ଏକ ଘରୋଇ ସଂସ୍ଥାରେ ସୁରକ୍ଷା କର୍ମୀ ଭାବେ କାମ କରୁଥିଲେ। ପୋଲିସ ତାଙ୍କୁ ଗିରଫ କରି କେନ୍ଦୁଝର ଆଣିବା ପରେ କୋର୍ଟ ଚାଲାଣ କରିଛି।