ମୃତ ବ୍ୟକ୍ତିଙ୍କୁ କରାଯାଉଥିଲା ଚିକିତ୍ସା; ହସ୍ପିଟାଲ୍‌ରୁ ସ୍ଥାନାନ୍ତରିତ କରିବାରୁ ଧରାପଡ଼ିଲା ସତ୍ୟ

ଚେନ୍ନାଇ, 30/9 (ସନ୍ଧାନ ନିୟୁଜ)  ତାମିଲନାଡୁର ନାଗପଟିନମ ଜିଲ୍ଲାରେ ଘଟିଯାଇଛି ଏକ ଅଭାବନୀୟ ଘଟଣା। ଶନିବାର ଅଭିଯୋଗ ହୋଇଛି ଯେ ଜିଲ୍ଲାର ଏକ ବେସରକାରୀ ହସ୍ପିଟାଲ୍‌ରେ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିବା ପରେ ବି ତାଙ୍କୁ ହସ୍ପିଟାଲ୍‌ ମଧ୍ୟରେ ରଖାଯାଇ ୩ ଦିନ ଧରି ଚିକିତ୍ସା କରାଯାଇଛି।

ଥାନଜଭୁର ସାଉଥ୍‌ ପୁଲିସ୍‌ ଷ୍ଟେସନ୍‌ରେ ଏ ନେଇ ଏକ ଅଭିଯୋଗ ଦାୟର ହୋଇଛି। ମୃତକ ଏନ୍‌ ଶିଖର(୫୫)ଙ୍କ ପୁଅ ଅଭିଯୋଗ ଆଣିଛନ୍ତି ଯେ ବେସରକାରୀ ହସ୍ପିଟାଲ୍‌ ତାଙ୍କ ବାପାଙ୍କ ମୃତ ଶରୀରକୁ ୩ ଦିନ ଧରି ରଖିଥିଲା। ତାଙ୍କ କହିବା କଥା ହେଲା ପରିବାର ଲୋକଙ୍କଠାରୁ ଟଙ୍କା ଶୋଷିବା ପାଇଁ ହସ୍ପିଟାଲ୍‌ ପକ୍ଷରୁ ମିଛରେ ତାଙ୍କ ବାପାଙ୍କ ଚିକିତ୍ସା କରାଯାଉଥିବା କୁହାଯାଇଥିଲା।