ରାଇରଙ୍ଗପୁର, ୯।୯ (ସନ୍ଧାନ ନ୍ୟୁଜ୍)- ବାଦାମପାହାଡ ଥାନା ଅଞ୍ଚଳରେ ଜଣେ ବିବାହିତା ମହିଳାଙ୍କୁ ଗଣଦୁଷ୍କର୍ମ ଅଭିଯୋଗରେ ଦୁଇ ଅଭିଯୁକ୍ତଙ୍କୁ ପୁଲିସ ଗିରଫ କରି ରାଇରଙ୍ଗପୁର କୋର୍ଟ ଚାଲାଣ କରିଥିବା ସୂଚନା ମିଳିଛି । ଘଟଣାରୁ ପ୍ରକାଶଯେ, ବାଦାମପାହାଡ ଥାନା ଅଞ୍ଚଳର ଜଣେ ୩୫ ବର୍ଷିୟା ବିବାହିତା ମହିଳା ଗତ ୪ ତାରିଖ ଶୁକ୍ରବାର ଦିନ ପ୍ରାୟ ୩ଟା ବେଳେ ବାଦାମପାହାଡ ମେଡିକାଲ ପଛପାଖ ଜଣଙ୍କ ଘରକୁ କୌଣସି କାମରେ ଯାଇ ଫେରୁଥିବାବେଳେ ଦୁଇଜଣ ବ୍ୟକ୍ତି ତାଙ୍କୁ ନିକଟସ୍ଥ ବାଲିଆପାଟ ପଟାସ ଜଙ୍ଗଲକୁ ଟେକିନେଇ ଜୋରଜବରଦସ୍ତ ଘଣଦୁଷ୍କର୍ମ କରି ଫେରାର ହୋଇଯାଇଥିଲେ । ଗଣଦୁଷ୍କର୍ମର ଶିକାର ହୋଇଥିବା ମହିଳା ଜଣକ ୫ ତାରିଖ ଶନିବାର ଦିନ ବାଦାମପାହାଡ ଥାନାରେ ଏନେଇ ଏକ ଏତଲା ଦାଏର କରିଥିଲେ । ପୀଡ଼ିତାଙ୍କ ଅଭିଯୋଗ ଭିତ୍ତିରେ ସେହିଦିନ ଥାନାରେ କେସ ନଂ ୪୮/୨୦ ମୂଳେ ୩୭୬ଡି, ୩୫୪ ଓ ୩୪ ଆଇପିସି ଦଫାରେ ଏକ ମାମଲା ରୁଜୁ କରି ଦୁଇ ଅଭିଯୁକ୍ତ ଦୁଝରଣ ଗ୍ରାମର ସିନୁ ନାଏକଙ୍କ ପୁଅ ମାଧ ନାଏକ (୪୦) ଏବଂ ସେହି ଗ୍ରାମର ନରସିଂହ ମାଝିଙ୍କ ପୁଅ ବିଶ୍ବନାଥ ମାଝି ଓରଫ ପୁଟୁରୁ (୨୮) ଙ୍କୁ ଗିରଫ କରାଯାଇଥିଲା । ଆଜି ଦୁହିଁଙ୍କୁ ରାଇରଙ୍ଗପୁର କୋର୍ଟ ଚାଲାଣ କରାଯାଇଥିବା ବାଦାମପାହାଡ ଆଇଆଇସି ତଥା ଆଇଓ ବିଜୟ କୁମାର ମୁର୍ମୁଙ୍କ ସୂତ୍ରରୁ ପ୍ରକାଶ ।
