ଭଦ୍ରକ ସୋସିଆଲ ସର୍ଭିସର ଦ୍ୱିତୀୟ ବାର୍ଷିକ ଉତ୍ସବ ପାଳିତ 

ଭଦ୍ରକ,  ୧୬/୧୦ (ସନ୍ଧାନ ନିଉଜ) : ଭଦ୍ରକର ଅନନ୍ୟ ସ୍ୱେଚ୍ଛାସେବୀ ସଂଗଠନ ଭଦ୍ରକ ସୋସିଆଲ ସର୍ଭିସ ବିଏସ୍ଏସର  ଦ୍ୱିତୀୟ ବାର୍ଷିକ ଉତ୍ସବ ଭଦ୍ରକ ଟାଉନ ହଲରେ ଅନୁଷ୍ଠିତ ହୋଇ ଯାଇଛି । ସଂଗଠନର ଦିଗ୍ଦର୍ଶକ ପଣ୍ଡିତ ସଂଗ୍ରାମ ଆଚାର୍ଯ୍ୟଙ୍କ ପୌରୋହିତ୍ୟରେ ଅନୁଷ୍ଠିତ ଉତ୍ସବରେ ଉଦ୍ଘାଟକ ଭାବେ ବହୁ ଅତିଥି ମାନେ  ଯୋଗ ଦେଇ ପ୍ରଦିପ ଜାଳି ଉତ୍ସବର ଉଦ୍ଘାଟନ କରିଥିଲେ । ବିଏସ୍ଏସର ଅଧ୍ୟକ୍ଷ ସଞ୍ଜିତ କୁମାର ନାୟକ ପ୍ରାରମ୍ଭିକ ସୂଚନା ପ୍ରଦାନ କରି ଏକ ବର୍ଷର ଜନ ସଚେତନତା, ଗରିବଙ୍କୁ ସହାୟତା, ରୋଗୀଙ୍କୁ ଚିକିତ୍ସା ସହଯୋଗ, ଅନାଥଙ୍କୁ ସାହାରା, ବୃକ୍ଷରୋପଣ କରି ପରିବେଶର ସୁରକ୍ଷା, ଯୋଗ ଶିକ୍ଷା ମାଧ୍ୟମରେ ନିରୋଗ ରହିବାର ମନ୍ତ୍ର ନେଇ ଆରମ୍ଭ ହୋଇଥିବା ସମ୍ପର୍କରେ ସୂଚନା ଦେଇଥିଲେ ।ସମ୍ପାଦକ  ପ୍ରକାଶ ସ୍ୱାଇଁ ବିବରଣୀ ଉପସ୍ଥାପନ କରିଥିଲେ । ଏହି ବିବରଣୀରେ ବର୍ଷକର ବିଭିନ୍ନ କାର୍ଯ୍ୟକ୍ରମର ସ୍ଥିରଚିତ୍ର ଓ ଭିଡିଓ ପ୍ରଦର୍ଶନ କରାଯାଇଥିଲା । ମୁଖ୍ୟ ଅତିଥି ଭାବେ ସାଂସଦ ମଞ୍ଜୁଲତା ମଣ୍ଡଳ,ମୁଖ୍ୟ ବକ୍ତା ଭାବେ ବିଧାୟକ ବିଷ୍ଣୁ ସେଠୀ, ସମ୍ମାନିତ ଅତିଥି ଭାବେ ଅତିରିକ୍ତ ଆରକ୍ଷୀ ଅଧିକ୍ଷକ ବିକାଶ ଦାସ,ଜିଲ୍ଲା କଂଗ୍ରେସ କାର୍ଯ୍ୟକାରୀ ସଭାପତି ନଳିନୀକାନ୍ତ ମହାନ୍ତି ଓ ଚଳଚିତ୍ର ଜଗତର ହିରୋଇନ ଏଲିନା ମହାନ୍ତି  ପ୍ରମୁଖ ଯୋଗ ଦେଇ ବିଏସ୍ଏସର ବିଭିନ୍ନ ସାମାଜିକ କାର୍ଯ୍ୟର ଭୁୟସୀ ପ୍ରଶଂସା କରିଥିଲେ । ସଂଗଠନ ଆଗକୁ ଆହୁରି ଅଧିକ ଜନହିତକର କାର୍ଯ୍ୟ କରୁ ବୋଲି ଅତିଥିମାନେ ଆଶା ପ୍ରକଟ କରିଥିଲେ । ଏହି ଅବସରରେ ବିଭିନ୍ନ ବର୍ଗର ପ୍ରତିଭାଵାନ ବ୍ୟକ୍ତିଙ୍କୁ  ସେମାନଙ୍କର ଉଲ୍ଲେଖନୀୟ କାର୍ଯ୍ୟ ପାଇଁ ସମ୍ମାନିତ କରିବା ସହ  ବାବା ବୁଢ଼ା ଗଣେଶ କମିଟି,ସାମ୍ବାଦିକା ପ୍ରତ୍ୟାଶା ପ୍ରିୟଦର୍ଶନୀ ମହାନ୍ତି ଓ ମହମଦ ଇମ୍ରାନ ଅଲିଙ୍କୁ ସମ୍ବର୍ଦ୍ଧିତ  କରାଯାଇଥିଲା । ଏହା ବ୍ୟତୀତ ଆମନ୍ତ୍ରିତ ଅତିଥିଙ୍କୁ ସମ୍ବର୍ଦ୍ଧିତ କରାଯିବା ସହ ବହୁ କୃତୀ ଛାତ୍ର ଛାତ୍ରୀ, ପ୍ରତିଭାଧାରୀ ବ୍ୟକ୍ତିତ୍ୱଙ୍କୁ ପ୍ରମାଣପତ୍ର ଦେଇ ସମ୍ମାନିତ କରାଯାଇଥିଲା । ବିଏସ୍ଏସର  ସଦସ୍ୟ ସଦସ୍ୟାମାନେ ମଞ୍ଚ ପରିଚାଳନା କରିଥିଲେ । ପରେ ଏକ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।