ଅନୁଗୋଳ,୧୨/୫ (ସନ୍ଧାନ ନିୟୁଜ) : ଅନୁଗୋଳ ଜିଲ୍ଲା କଣିହାଁ ଥାନା ବଡ଼ଗୁଣ୍ଡୁରୀ ପଞ୍ଚାୟତ ଅନ୍ତର୍ଗତ ଲୋହାମୁରା ଗ୍ରାମର ଅଭୟ ବେହେରା (୨୭)ନାମକ ଜଣେ ଟ୍ରାକ୍ଟର ଚାଳକଙ୍କ ମୃତ୍ୟୁ ଘଟିଛି। ସୂଚନାରୁ ପ୍ରକାଶ, ଅଭୟ ଆଜି ଅପରାହ୍ନରେ ନିକଟସ୍ଥ ବଇଣ୍ଡା ବାଲିପଶି ଗ୍ରାମକୁ ଟ୍ରାକ୍ଟର ଧରି ହଳ କରିବାକୁ ଯାଇଥିଲେ। ତେବେ ଅପରାହ୍ନ ପ୍ରାୟ ୫ଘଟିକା ସମୟରେ ହଠାତ ବିଜୁଳି, ଘଡ଼ଘଡ଼ି ସହ ବର୍ଷା ହୋଇଥିଲା। ଫଳରେ ଅଭୟ ସାଥିରେ ଥିବା ଭୀମ ଭୋଇ ଓ ବିଜୟ ଭୋଇଙ୍କୁ ସାଙ୍ଗରେ ଧରି ଜମି ପାଖରେ ଥିବା ଏକ ମହୁଲ ଗଛ ମୂଳରେ ଆଶ୍ରୟ ନେଇଥିଲେ। ସେହି ସମୟରେ ବଜ୍ରପାତ ହେବାରୁ ଅଭୟଙ୍କ ଛାତିରେ ଗୁରୁତର ଆଘାତ ଲାଗିଥିଲା। ଘଟଣାସ୍ଥଳରେ ୩ଜଣ ଚେତାଶୂନ୍ୟ ହୋଇ ଯାଇଥିଲେ। ତେବେ ଗୁରୁତର ଅବସ୍ଥାରେ ଅଭୟଙ୍କୁ କଣିହାଁ ମେଡ଼ିକାଲରେ ଭର୍ତି କରାଯାଇଥିଲା। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷିତ କରିଥିଲେ। ତେବେ ଅନ୍ୟ ୨ଜଣଙ୍କର ଚେତା ଫେରି ଆସିଥିଲା। ଖବରପାଇ କଣିହାଁ ପୋଲିସ ଘଟଣାସ୍ଥଳରେ ପହଂଚି ଶବ ଜବତ କରି ବ୍ୟବଚ୍ଛେଦ ପାଇଁ ତାଳଚେର ଉପଖଣ୍ଡ ଡାକ୍ତରଖାନାକୁ ପଠାଇଥିଲେ।
