ପ୍ରଖର ଜଳ ସ୍ରୋତରେ ଭାସିଗଲା ଆମ୍ବୁଲାନ୍ସ , ଅଳ୍ପକେ ବର୍ତ୍ତିଲା ଚାଳକ

ରାଉରକେଲା, ୨୦/୦୬ (ସନ୍ଧାନ ନିଉଜ): ନଦୀର ପ୍ରଖର ଜଳ ସ୍ରୋତରେ ଭାସିଗଲା ଆମ୍ବୁଲାନ୍ସ। ହେଲେ ଅଘଟଣରୁ ଅଳ୍ପକେ ବର୍ତ୍ତିଗଲେ ଚାଳକ। ଘଟଣାଟି ସୁନ୍ଦରଗଡ ଜିଲ୍ଲାର ଗୁରୁଣ୍ଡିଆ ବ୍ଲକର ଗୁରୁଣ୍ଡିଆ ନାଳରେ ଘଟିଛି। ଶନିବାର ଏକ ଆମ୍ବୁଲାନ୍ସ ଚାଳକ ଗାଡିଟିକୁ ଧୋଉଥିବା ବେଳେ ହଠାତ୍ ପାହାଡ଼ ପାଣି ନାଳକୁ ମାଡି ଆସିବାରୁ ଆମ୍ବୁଲାନ୍ସ ସହ ଚାଳକ ଜଣକ ଭାସି ଯାଇଥିଲେ। କିଛି ଲୋକ ତୁରନ୍ତ ଅଗ୍ନିଶମ ବିଭାଗକୁ ଖବର ଦେଇଥିଲେ। ପାଣିର ପ୍ରଖର ସ୍ରୋତରେ ଆମ୍ବୁଲାନ୍ସଟି କିଛି ଦୂର ଭାସି ଯିବା ପରେ ମଝିରେ ଅଟକି ରହିଥିଲା। ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ଚାଳକ ଓ ଆମ୍ବୁଲାନ୍ସ କୁ ଉଦ୍ଧାର କରିଥିଲେ। ଚାଳକଟି ସୁରକ୍ଷିତ ଥିବା ଅଗ୍ନିଶମ ବିଭାଗ ପକ୍ଷରୁ ସୂଚନା ମିଳିଛି।