ପାଚେରି ଡେଇଁ ଶ୍ୱଶୁର ଘରେ ପଶୁଥିବାବେଳେ ଜ୍ୱାଇଁଙ୍କୁ ଛେଚିଲେ ଗ୍ରାମବାସୀ

ପୁରୀ,  ୨୭/୧୧ (ସନ୍ଧାନ ନିଉଜ) : ଶ୍ବଶୁର ଘରେ ପଶିବାକୁ ଉଦ୍ୟମ କରି ସାହିବାସିନ୍ଦାଙ୍କଠାରୁ ଜଣେ ଜ୍ବାଇଁ ଛେଚା ଖାଇଥିବା ଜଣାପଡ଼ିଛି। ଏପରିକି ସେଠାରୁ ଗାଡ଼ିରେ ଖସିଯିବା ବେଳେ ତିନି ଜଣଙ୍କୁ ଧକ୍କା ଦେବା ଅଭିଯୋଗରେ ବଳିଆପଣ୍ଡା ଥାନା ପୁଲିସ ଏହି ଜ୍ବାଇଁକୁ ଗିରଫ କରି କୋର୍ଟଚାଲାଣ କରିଛି। ଅନ୍ୟପଟେ ଏହି ଗାଡ଼ି ଧକ୍କାରେ ତିନି ଜଣ ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଖବର ନେବାରେ ଜଣାପଡ଼ିଛି ଯେ ଚନ୍ଦନପୁର ଥାନା ଅନ୍ତର୍ଗତ ବାଲିପଡ଼ା ଗୋପୀନାଥପୁରର ବାଙ୍ଗୁରିଆ ଗାଁ’ର ବାପି ଓରଫ ମାନସ ଭୋଇ(୩୨) ଗତକାଲି ରାତି ପ୍ରାୟ ସାଢ଼େ ବାରଟା ସମୟରେ ଏକ ଟାଟା ମ୍ୟାଜିକ ଗାଡ଼ି ନେଇ ବଳିଆପଣ୍ଡାସ୍ଥିତ ଶ୍ବଶୁର ଘରକୁ ଆସିଥିଲା। ସେ ଗାଡ଼ି ବାହାରେ ରଖି ଶ୍ବଶୁର ଘର ପାଚେରି ଡେଇଁ ଘର ଭିତରେ ପଶିବାକୁ ଉଦ୍ୟମ କରିବା ସମୟରେ କୁକୁର ଭୁକିବାରୁ ପଡ଼ିଶାଘର ଲୋକେ ଉଠିପଡ଼ିଥିଲେ। ତେଣୁ ପଡ଼ିଶା ଘରକୁ କେହି ଜଣେ ଚୋର ଭଳି ପଶିବାକୁ ଉଦ୍ୟମ କରିଥିବା ଦେଖି ପଡ଼ୋଶୀ ବୈରାଗୀ ସାହୁ, ଲକ୍ଷ୍ମୀ ସାହୁ ଓ କୃଷ୍ଣଚନ୍ଦ୍ର ସାହୁ ବାପିଙ୍କୁ ଅଟକାଇ ମାରପିଟ୍ କରିଥିଲେ। ତେଣୁ ରାତି ଅଧରେ ପାଟି ଶୁଣି ଲୋକେ ଉଠିପଡ଼ିବାରୁ ବାପି ସେଠାରୁ ଗାଡ଼ି ନେଇ ଖସିଯିବାକୁ ଉଦ୍ୟମ କରି ବୈରାଗୀ ସାହୁ, ଲକ୍ଷ୍ମୀ ସାହୁ ଓ କୃଷ୍ଣଚନ୍ଦ୍ର ସାହୁଙ୍କ ଧକ୍କା ଦେଇଥିଲେ। ତେଣୁ ସ୍ଥାନୀୟ ଲୋକମାନେ ବାପିକୁ ଧରି ପୁଲିସର ଜିମା ଦେଇଥିଲେ।