କଟକ ୧୬/୩ (ସନ୍ଧାନ ନିୟୁଜ) ପୁଣି ଏକ ସେଲ୍ଟର୍ ହୋମ୍ରେ ଚଢ଼ଉ। ଚୌଦ୍ୱାର ଶଙ୍କରପୁର ସ୍ଥିତ ଗୁଡ୍ ନିଉଜ୍ ଇଣ୍ଡିଆର ଏକ ଶାଖା ଡ୍ରିମ୍ ହୋମ୍ରେ ଗତକାଲି ଜିଲ୍ଲା ଶିଶୁ ମଙ୍ଗଳ କମିଟି ଓ ଜିଲ୍ଲା ଶିଶୁ ସୁରକ୍ଷା ଅଧିକାରୀ ଚଢ଼ଉ କରି ୪୨ ଜଣ ପିଲାଙ୍କୁ ଉଦ୍ଧାର କରିଛନ୍ତି। ତେବେ ଆଉ ୮ଜଣ ପିଲା ନିଖୋଜ ଥିବା ଜଣାପଡ଼ିଛି। ଉଦ୍ଧାର କରାଯାଇଥିବା ସମସ୍ତ ପିଲାଙ୍କୁ ଚୌଦ୍ୱାର ସ୍ଥିତ ଶିଶୁ ସଦନରେ ରଖାଯାଇଛି।
ଢେଙ୍କାନାଳ ବେଲ୍ଟିକିରି ସେଲ୍ଟର୍ ହୋମ୍ ସିଲ୍ ହେବା ସହ ସଂସ୍ଥା ଦ୍ୱାରା ପରିଚାଳିତ ୨୨ଟି ଶିଶୁ ଅନୁଷ୍ଠାନକୁ ବନ୍ଦ କରାଯାଇଥିଲା। ତେବେ ଅନୁଷ୍ଠାନଟି ସରକାରୀ ସ୍ତରରେ ବନ୍ଦ କରାଯାଇଥିବା ବେଳେ ଏଠାରେ ବେଆଇନ୍ ଭାବେ ପିଲାଙ୍କୁ ରଖା ଯାଇଥିବା ଖବର ପାଇ ସିଡବ୍ଲ୍ୟୁସି ଅଧ୍ୟକ୍ଷା ମନ୍ଦାକିନୀ ଜେନାଙ୍କ ସହିତ ଅନ୍ୟ ପ୍ରମୁଖ ସଦସ୍ୟଙ୍କ ସହ ପହଞ୍ଚି ଚୌଦ୍ୱାର ପୁଲିସ୍ ସହାୟତାରେ ପିଲାମାନଙ୍କୁ ଉଦ୍ଧାର କରିଥିଲେ।
ସିଡବ୍ଲ୍ୟୁସି ଅଧ୍ୟକ୍ଷା କହିଛନ୍ତି, ପିଲାଙ୍କର ଏବେ ପରୀକ୍ଷା ଅଛି। ତେବେ ସେଥିରେ ସେମାନଙ୍କର କିଛି ଅସୁବିଧା ହେବ ନାହିଁ। ସେମାନେ ଯେଉଁ ସ୍କୁଲ୍ରେ ପଢୁଥିବେ ସେଠାରେ ପରୀକ୍ଷା ଦେବା ପାଇଁ ସମସ୍ତ ବ୍ୟବସ୍ଥା କରାଯିବ।
