ଭଦ୍ରକ, 28/02/2022 (ସନ୍ଧାନ ନିଉଜ) ଚୋରା ମଦ କାରବାର ରୋକିବା ପାଇଁ ଭଦ୍ରକ ଅବକାରୀ ବିଭାଗ ତରଫରୁ ବ୍ୟାପକ ଚଢ଼ାଉ କରାଯାଉଛି । ଦେଶୀ , ବିଦେଶୀ ଓ ବିଅର ଜବତ କରିବା ସହ ଚୋରା ମଦ ବେପାର ଅଭିଯୋଗରେ ଦୁଇ ଜଣଙ୍କୁ ଗିରଫ କରିଛି ଅବକାରୀ ବିଭାଗ।
ଗିରଫ ଅଭିଯୁକ୍ତ ମାନେ ହେଲେ ଧୁଷୁରୀ ଥାନା ଅନ୍ତର୍ଗତ ନଦୀଗାଁ ଗ୍ରାମର ପଞ୍ଚାନନ ସାହୁ ଓରଫ ପଞ୍ଚୁଆ ଏବଂ ବେତାଳିଗାଁ ଗ୍ରାମର ମଙ୍ଗୁଳି ମଳିକ ବୋଲି ଅବକାରୀ ବିଭାଗ ତରଫରୁ ସୂଚନା ମିଳିଛି । ଜବତ ମଦର ଆନୁମାନିକ ମୂଲ୍ୟ ଏକ ଲକ୍ଷ ଟଙ୍କାରୁ ଉର୍ଦ୍ଧ୍ବ ହେବ ବୋଲି ଅବକାରୀ ବିଭାଗ ସୂଚନା ଦେଇଛି ।
ଅବକାରୀ ନିରୀକ୍ଷକ ଧନେଶ୍ୱର ବରାଡ଼ଙ୍କ ନେତୃତ୍ୱରେ ଜିଲ୍ଲା ଅବକାରୀ ବିଭାଗ ପକ୍ଷରୁ ଧାମନଗର ଅବକାରୀ ଥାନା ଭାରପ୍ରାପ୍ତ ଅଧିକାରୀ ପ୍ରହଲ୍ଲାଦ ସାମଲ ଓ ଷ୍ଟାଫମାନଙ୍କୁ ନେଇ ଗଠିତ ଏକ ସ୍ୱତନ୍ତ୍ର ଟିମ ବିଭିନ୍ନ ସ୍ଥାନରେ ଚଢ଼ାଉ କରିଛନ୍ତି ।
ଚଢ଼ାଉ ବେଳେ ଧୁଷୁରୀ ଥାନା ଅନ୍ତର୍ଗତ ନଦୀଗାଁ, ବେତାଳିଗାଁ ବଜାର ଓ ଧୁଷୁରୀ ବଜାର ଅଞ୍ଚଳରେ ଚଢାଉ କରାଯାଇ ୧୪୪ ଲିଟର ବିଅର, ୨୩ ଲିଟର ବିଦେଶୀ ଓ ୫ ଲିଟର ଆସ୍କା ଫୋଟି ମଦ ଜବତ କରାଯାଇଛି ।
