ଆମେଥୀ, ଏପ୍ରିଲ ୧୮ (ଖବର ଓଡ଼ିଶା): ଉତ୍ତର ପ୍ରଦେଶର ଆମେଥୀରେ ରବିବାର ବିଳମ୍ବିତ ରାତିରେ ଏକ ବଡ଼ ସଡ଼କ ଦୁର୍ଘଟଣା ଘଟିଛି । ଟ୍ରକ୍ ଓ ବୋଲୋରୋ ମୁହାଁମୁହିଁ ହେବାରୁ ବୋଲୋରୋରେ ଥିବା ୬ ଜଣଙ୍କର ମୃତ୍ୟୁ ହୋଇଛି । ଅନ୍ୟ ୪ ଜଣ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଗୌରୀଗଂଜ ଥାନା ଅଞ୍ଚଳରେ ଏହି ଦୁର୍ଘଟଣା ଘଟିଛି ।
ରିପୋର୍ଟ ଅନୁସାରେ ରାତି ୧୨ଟା ୧୫ରେ ବିବାହ ସମାରୋହରୁ ଫେରୁଥିବା ବରଯାତ୍ରୀ ଗାଡ଼ି (ବୋଲେରୋ) ସଡ଼କ ଦୁର୍ଘଟଣାର ସାମ୍ନା କରିଥିଲା । ରାୟବରେଲି ଜିଲ୍ଲାର ନସୀରାବାଦ ଅଞ୍ଚଳରୁ ଯାଇଥିବା ବରାଯାତ୍ରୀ ଗାଡ଼ି ଫେରୁଥିବା ଗାଡ଼ିରେ କିଛି ଶିଶୁ ମଧ୍ୟ ଥିଲେ । ଗୌରୀଗଂଜ ଥାନା ଅନ୍ତର୍ଗତ ବାବୁଗଂଜ ପହଞ୍ଚିଲା ବେଳକୁ ଏକ ଟ୍ରକ୍ ମୁହାଁମୁହିଁ ଧକ୍କା ଦେଇଥିଲା ।
ଦ୍ରୁତଗାମୀ ବୋଲୋରୋ ଓ ଟ୍ରକ୍ର ଦୁର୍ଘଟଣା ଭୟଙ୍କର ଥିଲା । ଏତେ ଜୋରରେ ଶବ୍ଦ ହୋଇଥିଲା ଯେ, ଆଖପାଖର ଲୋକେ ହଠାତ୍ ପହଞ୍ଚି ଯାଇଥିଲେ । ବୋଲେରୋରେ ଫସିଥିବା ଲୋକଙ୍କୁ ଉଦ୍ଧାର କରିବାକୁ ଉଦ୍ୟମ କରିଥିଲେ । ସ୍ଥାନୀୟ ଲୋକଙ୍କ ଠାରୁ ସୂଚନା ମିଳିବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ପୋଲିସ ସମସ୍ତଙ୍କୁ ଉଦ୍ଧାର କରି ଡାକ୍ତରଖାନା ପଠାଇଥିଲା । କିନ୍ତୁ ଡାକ୍ତର ୬ ଜଣଙ୍କୁ ମୃତ ଘୋଷଣା କରିଥିଲେ ।
