ସଡକ ଦୁର୍ଘଟଣାରେ ଶଳା ଭିଣୋଇଙ୍କ ମୃତ୍ୟୁ, ମାହାଙ୍ଗାରେ ଶୋକାକୂଳ ପରିବେଶ

ମାହାଙ୍ଗା,୨୧/୪ (ସନ୍ଧାନ ନିୟୁଜ) : କଟକ-ଚାନ୍ଦବାଲି ରାସ୍ତାର ଖରାଖିଆ ଠାରେ ଆଜି ଏକ ପିକଅପ ଭ୍ୟାନ ଧକ୍କାରେ ଜଣେ ବାଇକ ଆରୋହୀଙ୍କ ମୃତ୍ୟୁ ଘଟିଥିବାବେଳେ ଆଉ ଜଣେ ଗୁରୁତର ହେବା ଖବର ମିଳିଥିଲା l ତେବେ ଗୁରୁତର ଜଣକୁ ଉଦ୍ଧାର କରାଯାଇ କଟକ ବଡ ମେଡିକାଲକୁ ଚିକିତ୍ସା ପାଇଁ ପଠା ଯାଇଥିଲା l କିନ୍ତୁ ଡାକ୍ତରଖାନା ଯିବା ରାସ୍ତାରେ ତାଙ୍କର ମୃତ୍ୟୁ ହୋଇଯାଇଥିଲା l ଏମାନଙ୍କ ମଧ୍ୟରୁ ଜଣଙ୍କ ହେଲେ କଟକ ଜିଲ୍ଲା ମାହାଙ୍ଗା ଥାନା ପୋଡାମରାଇ ଗାଁ’ର ନୃସିଂହ ରାଉତ ଏବଂ ଆର ଜଣକ ହେଲେ ମାହାଙ୍ଗା ଅଂଚଳ ବାରାହୀପୁର ଗାଁ’ର ମହେନ୍ଦ୍ର ରାଉତ।

ଉଭୟେ ସାଲେପୁର ବଜାରରେ ଜଳଖିଆ କରି ଏକ ବାଇକ ଯୋଗେ ସେଠାରୁ କଟକ ଅଭିମୁଖେ ଯାଉଥିବା ବେଳେ ପିକପଭ୍ୟାନଟି ସେମାନଙ୍କୁ ଧକ୍କା ଦେବାରୁ ଘଟଣା ସ୍ଥଳରେ ମହେନ୍ଦ୍ର ରାଉତ ଓ ନୃସିଂହ ଉଭୟ ଗୁରୁତର ଆହତ ହୋଇ ପ୍ରଥମେ ମହେନ୍ଦ୍ରଙ୍କର ମୃତ୍ୟୁ ଘଟିଥିବା ଦେଖିବାକୁ ମିଳିଥିଲା l ତେବେ ନୃସିଂହ ରାଉତଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ କଟକ ବଡ ଡାକ୍ତରଖାନାକୁ ନିଆଯିବା ବାଟରେ ତାଙ୍କର ମଧ୍ୟ ମୃତ୍ୟୁ ହୋଇଯାଇଥିଲା l

ମାହାଙ୍ଗା ପୁଷ୍ପଗିରି କଲେଜ ଏରକଣା ଠାରେ ନୃସିଂହ ମୁଖ୍ୟ କିରାଣୀ ଭାବରେ କାର୍ଯ୍ୟ କରନ୍ତି l ଉଭୟ ନୃସିଂହ ଓ ମହେନ୍ଦ୍ର ସମ୍ପର୍କରେ ଶଳା ଭିଣୋଇ ଅଟନ୍ତି l ଏହି ମର୍ମନ୍ତୁଦ ସଡକ ଦୁର୍ଘଟଣା ଖବର ଶୁଣିବା ପରେ ମାହାଙ୍ଗା ଅଂଚଳରେ ଶୋକର ଛାୟା ଖେଳିଯାଇଛି l କଟକ ବଡ ଡାକ୍ତରଖାନାରେ ମୃତକଙ୍କ ଶବ ବ୍ୟବଚ୍ଛେଦ ପରେ ଉଭୟଙ୍କ ମରଦେହକୁ ମାହାଙ୍ଗାର ଏରକଣା ଅଂଚଳକୁ ଅଣାଯିବା ପରେ ସ୍ଥାନୀୟ ଅଂଚଳ ଶୋକାକୁଳ ହୋଇ ପଡିବା ଦେଖିବାକୁ ମିଳିଥିଲା l