ବଲାଙ୍ଗୀର,୩୧/୮(ସନ୍ଧାନ ନିୟୁଜ): କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି ନଡ୍ଡାଙ୍କ ଉପସ୍ଥିତିରେ ଭୀମଭୋଇ ମେଡିକାଲ କଲେଜକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକାର୍ପିତ କରିଛନ୍ତି । ଏହି ଅବସରରେ ଅନୁଷ୍ଠିତ ସାଧାରଣ ସଭାରେ ସ୍ଥାନୀୟ ଅଞ୍ଚଳ ଓ ଓଡ଼ିଶାବାସୀଙ୍କୁ ସମ୍ବୋଧିତ କରି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି ଯେ ଭୀମଭୋଇ ମେଡିକାଲ୍‌ କଲେଜ୍‌ ପ୍ରତିଷ୍ଠା ହେବା ପରେ ଅଞ୍ଚଳବାସୀଙ୍କ ଦୀର୍ଘ ଦିନର ସ୍ବପ୍ନ ପୂରଣ ହୋଇଛି। ରାଜ୍ୟ ରକାର ସବୁ ବର୍ଗର ​ଲୋକଙ୍କୁ ସ୍ବାସ୍ଥ୍ୟ ସେବା ଯୋଗାଇ ଦେବାକୁ ଲକ୍ଷ୍ୟ ରଖିଛନ୍ତି। ଭୀମଭୋଇ ମେଡିକାଲ୍‌ କଲେଜ୍‌ ଏ ଦିଗରେ ସହାୟକ ହୋଇପାରିବ। ଏଥିସହିତ ଭୀମଭୋଇ ମେଡିକାଲ୍‌ କଲେଜ ଓ ପ୍ରଥମ ବର୍ଷ ଛାତ୍ରଛାତ୍ରୀଙ୍କ ସେ ଉତ୍ତରୋତ୍ତର ଉନ୍ନତି କାମନା କରିଥିଲେ।

ସ୍ୱାସ୍ଥ୍ୟମନ୍ତ୍ରୀ ଜେ.ପି ନଡ୍ଡା କହିଛନ୍ତି ଯେ, ରାଜ୍ୟରେ ଅନ୍ୟ ଏକ ମେଡିକାଲ ସ୍ଥାପନ ହେବାର ଆବଶ୍ୟକତା ରହିଛି । ରାଜ୍ୟ ସରକାର ଜମି ଯୋଗାଇ ଦେଲେ କେନ୍ଦ୍ର ସରକାର ଏଠାରେ ମେଡିକାଲ ନିର୍ମାଣ କରିବେ । କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାକୁ ରାଜ୍ୟ ସରକାର କାର୍ଯ୍ୟକାରୀ କରନ୍ତୁ ବୋଲି କେନ୍ଦ୍ରମନ୍ତ୍ରୀ ଶ୍ରୀ ନଡ୍ଡା ଆହ୍ବାନ ଦେଇଛନ୍ତି । ସାଧାରଣ ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇବା ଆୟୁଷ୍ମାନ ଭାରତ ଯୋଜନାର ମୁଖ୍ୟ ଲକ୍ଷ୍ୟ ।  ଏହା ଦ୍ବାରା ଗରିବ ରୋଗୀ ଉପକୃତ ହେବେ ଏବଂ ସ୍ବାସ୍ଥ୍ୟସେବା ସୁବିଧା ପାଇବେ । ଏହି ଯୋଜନାରେ ରୋଗୀ ଦେଶର ଯେକୌଣସି ସ୍ଥାନରେ ଚିକିତ୍ସାର ସୁବିଧା ପାଇ ପାରିବେ  ବୋଲି ସେ କହିଛନ୍ତି।  ଏହି ଅବସରରେ ଲୋକସଭା ସାଂସଦ କଳିକେଶ ନାରାୟଣ ସିଂହଦେଓ, ରାଜ୍ୟ ସ୍ବାସ୍ଥ୍ୟମନ୍ତ୍ରୀ ପ୍ରତାପ ଜେନା, ବିରୋଧୀ ଦଳ ନେତା ନରସିଂହ ମିଶ୍ର, ଜିଲ୍ଲାପାଳ ଅରିନ୍ଦମ ଡାକୁଅ, ମେଡିକାଲ କଲେଜ ଡିନ୍ ଡ.ଲଳିତ କୁମାର ମେହେର ଉପସ୍ଥିତ ଥିଲେ ।