ଭାରତର ହେଲା ରାଫେଲ: ପହଞ୍ଚିବାକୁ ଲାଗିବ ୮ ମାସ, ଉଡିବାକୁ ୧୮ ମାସ

ନୂଆଦିଲ୍ଲୀ,୯।୧୦ (ସନ୍ଧାନ ନିୟୁଜ): ଦୀର୍ଘ ଦିନର ଅପେକ୍ଷା ପରେ ଏବେ ଭାରତର ହୋଇଛି ଯୁଦ୍ଧ ବିମାନ ରାଫେଲ। ପ୍ରତିକ୍ଷାମନ୍ତ୍ରୀ ରାଜନାଥ ସିଂ ମଙ୍ଗଳବାର ଫ୍ରାନ୍ସରେ ପ୍ରଥମ ରାଫେଲ ବିମାନକୁ ଗ୍ରହଣ କରିଛନ୍ତି। ଦଶହରା ଥିବାରୁ ସେଠାରେ ସେ ଶସ୍ତ୍ରପୂଜା କରିବା ପରେ ଏହି ଯୁଦ୍ଧ ବିମାନକୁ ଗ୍ରହଣ କରିଛନ୍ତି। ଏବେ ଭାରତ ଆକାଶମାର୍ଗରେ ଆହୁରି ଶକ୍ତିଶାଳୀ ହୋଇଯାଇଛି। ସବୁଠାରୁ ବଡ କଥା ହେଲା ଏହି ଯୁଦ୍ଧ ବିମାନ ଭାରତୀୟ ବାୟୁସେନାରେ ସାମିଲ ହେବାକୁ ଆହୁରି ଲମ୍ବା ସମୟ ଲାଗିବ। ଏହା ଆସନ୍ତା ବର୍ଷ ମେ’ ମାସରେ ଭାରତ ଆସିବ ବୋଲି ଯୋଜନା ରହିଛି। ଅର୍ଥାତ୍‌ ଏହା ଭାରତ ପହଞ୍ଚିବାକୁ ୮ମାସ ଓ ଉଡିବାକୁ ୧୮ ମାସ ସମୟ ଲାଗିବ ବୋଲି କୁହାଯାଉଛି। କାରଣ ଏହାର ପାଇଲଟ, ଇଞ୍ଜିନିୟର ଓ ଟେକ୍ନିସିଆନମାନେ ଏବେ ଫ୍ରାନ୍ସରେ ପ୍ରଶିକ୍ଷଣ ନେବେ। ଏହାପରେ ଯାଇ ରାଫେଲ ଭାରତୀୟ ବାୟୁସେନାରେ ତା’ର ଶକ୍ତି ପ୍ରଦର୍ଶନ କରିବ। ଚୁକ୍ତି ଅନୁଯାୟୀ ସମସ୍ତ ୩୬ଟି ଯାକ ଯୁଦ୍ଧ ବିମାନ ୨୦୨୨ ଏପ୍ରିଲ ସୁଦ୍ଧା ଭାରତ ପହଞ୍ଚିବ ବୋଲି ସୂଚନା ମିଳିଛି। ତେବେ ୨୦୧୬ ସେପ୍ଟେମ୍ବରରେ ଫ୍ରାନ୍ସଠାରୁ ଭାରତ ଏହି ଯୁଦ୍ଧ ବିମାନ କ୍ରୟ କରିବ ବୋଲି ଚୁକ୍ତି ହୋଇଥିଲା। ୩୬ଟି ବିମାନ ମଧ୍ୟରୁ ୧୮ଟି ଅମ୍ବାଲା ଓ ଅନ୍ୟ ୧୮ଟି ହାସିମରା ଏୟାରବେସରେ ରଖାଯିବ ବୋଲି ଜଣାପଡିଛି।